ന്യൂഡൽഹി: ബലാത്സംഗക്കേസിൽ നടൻ സിദ്ദിഖിന് ഇന്ന് നിർണായക ദിനം. സിദ്ദിഖിന്റെ മുൻകൂർ ജാമ്യാപേക്ഷ സുപ്രീം കോടതി ഇന്ന് പരിഗണിക്കും. സർക്കാരും കേസിലെ പരാതിക്കാരിയുമാണ് കേസിലെ എതിർ കക്ഷികൾ. സിദ്ദിഖ് കേസുമായി സഹകരിക്കുന്നില്ലെന്ന സർക്കാരിന്റെ വാദത്തിന് നടന്റെ അഭിഭാഷകനായ മുകുൾ റോഹ്തഗി മറുപടി നൽകും. ജസ്റ്റിസുമാരായ ബേല എം ത്രിവേദി, സതീഷ് ചന്ദ്ര ശർമ്മ എന്നിവരുടെ ബെഞ്ചാണ് ജാമ്യാപേക്ഷ പരിഗണിക്കുന്നത്.
ആരോഗ്യപ്രശ്‌നങ്ങളെ തുടർന്ന് സിദ്ദിഖിന് ഹാജരാകാൻ സാധിക്കില്ലെന്ന് അഭിഭാഷകൻ സുപ്രീം കോടതിയെ അറിയിച്ചു. ഇതോടെ കഴിഞ്ഞ ആഴ്ച പരിഗണിക്കേണ്ട കേസ് ഇന്നത്തേക്ക് മാറ്റുകയായിരുന്നു. സത്യങ്ങൾ വളച്ചൊടിച്ചാണ് പൊലീസ് കേസെടുത്തിരിക്കുന്നതെന്ന് ചൂണ്ടിക്കാട്ടി സിദ്ദിഖ് സത്യവാങ്മൂലം സമർപ്പിച്ചിരുന്നു.
പരാതിക്കാരി ഉന്നയിക്കാത്ത കാര്യങ്ങളാണ് പൊലീസ് പറയുന്നത്. തനിക്കെതിരെ മാദ്ധ്യമവിചാരണയ്‌ക്ക് അവസരമൊരുക്കാനാണ് പൊലീസ് ശ്രമിക്കുന്നത്. ശരിയായ അന്വേഷണം നടത്താതെയാണ് തന്നെ
പ്രതിയാക്കിയതെന്നും സിദ്ദിഖ് സമർപ്പിച്ച സത്യവാങ്മൂലത്തിൽ പറയുന്നു.
അതേസമയം, കഴിഞ്ഞ ആഴ്ച സിദ്ദിഖിന്റെ ഇടക്കാല ജാമ്യം കോടതി നീട്ടി നൽകിയിരുന്നു. 2016 ലാണ് കേസിനാസ്പദമായ സംഭവം നടന്നത്. 8 വർഷം വിവരം പുറത്ത് പറയാതിരുന്നത് എന്തുകൊണ്ടെന്ന് ചോദിച്ചായിരുന്നു കോടതി സിദ്ദിഖിന്റെ ഇടക്കാല ജാമ്യം നീട്ടിയത്.
