ചരിത്രം, മാതൃകാപരം; ഭാരതത്തിന്റെ യശസുയർത്തിയ ചെസ് ചാമ്പ്യൻ ​ഗുകേഷിന് അഭിനന്ദനങ്ങളുമായി പ്രധാനമന്ത്രി

ന്യൂഡൽഹി: ലോകചെസ് ചാമ്പ്യൻഷിപ്പിൽ ചൈനയുടെ ഡിങ് ലിറനെ പരാജയപ്പെടുത്തി ഇന്ത്യയുടെ അഭിമാനമായി മാറിയ ​​ഗുകേഷ് ദൊമ്മരാജുവിനെ അഭിനന്ദിച്ച് പ്രധാനമന്ത്രി നരേന്ദ്രമോദി. പ്രധാനമന്ത്രിയുടെ ഔദ്യോ​ഗിക എക്സ് അക്കൗണ്ടിലൂടെയാണ് അഭിനന്ദനം അറിയിച്ചത്. ചരിത്രപരവും മാതൃകാപരവുമെന്നാണ് ​ഗുകേഷിന്റെ വിജയത്തെ പരാമർശിച്ചുകൊണ്ട് പ്രധാനമന്ത്രി വിശേഷിപ്പച്ചത്.

“സവിശേഷമായ ഈ നേട്ടത്തിന് ​ഗുകേഷിന് അഭിനന്ദനങ്ങൾ. സമാനതകളില്ലാത്ത കഠിനാധ്വാനത്തിന്റെയും കഴിവിന്റെയും നിശ്ചയദാർഢ്യത്തിന്റെയും ഫലമാണ് ഈ വിജയം. ​ഗുകേഷിന്റെ ഈ നേട്ടം ചെസ് ചരിത്രത്തിൽ എഴുതപ്പെടുക മാത്രമല്ല, ലക്ഷക്കണക്കിന് യുവാക്കളെ പ്രചോദിപ്പിക്കുകയും സ്വപ്നം കാണിക്കുകയും ചെയ്യും. അദ്ദേഹത്തിന് ഉജ്ജ്വല ഭാവിയ്‌ക്ക് വേണ്ടി എല്ലാവിധ ആശംസകളും നേരുന്നു – എന്ന് പ്രധാനമന്ത്രി എക്സിൽ കുറിച്ചു.

Historic and exemplary!

Congratulations to Gukesh D on his remarkable accomplishment. This is the result of his unparalleled talent, hard work and unwavering determination.

His triumph has not only etched his name in the annals of chess history but has also inspired millions… https://t.co/fOqqPZLQlr pic.twitter.com/Xa1kPaiHdg

— Narendra Modi (@narendramodi) December 12, 2024

14-ാം ​ഗെയിമിലാണ് ​ചൈനീസ് താരത്തെ വീഴ്‌ത്തി ഗുകേഷ് കിരീടം സ്വന്തമാക്കിയത്. രാജ്യത്തിന്റെ അഭിമാന താരമായ ചെസ് ചാമ്പ്യൻ വിശ്വനാഥൻ ആനന്ദിന് ശേഷം ഈ നേട്ടം സ്വന്തമാക്കുന്ന താരമാണ് ​ഗുകേഷ്. ചൈനയുടെ ‍ഡിങ് ലിറനെ പരാജയപ്പെടുത്തികൊണ്ട് ചരിത്രത്തിലെ ഏറ്റവും പ്രായം കുറഞ്ഞ ചാമ്പ്യനെന്ന നേട്ടവും സ്വന്തമാക്കിയിരിക്കുകയാണ് ഈ പതിനെട്ടുകാരൻ. വിജയം നേടി, നിറകണ്ണുകളോടെ നിൽക്കുന്ന ​ഗുകേഷിന്റെ ദൃശ്യങ്ങൾ സമൂഹമാദ്ധ്യമങ്ങൾ ഏറ്റെടുത്തുകഴിഞ്ഞു.

ഏഴാം വയസിൽ തുടങ്ങിയ ​ഗുകേഷിന്റെ കരുനീക്കം ഇന്ന് ലോകവേദിയിൽ ഭാരതത്തിന്റെ യശസ് വാനോളമുയർത്തി. ബാല്യകാലം മുതൽ ചെസിനെ സ്നേ​ഹിച്ച ​ഗുകേഷ് രാജ്യത്തിനും മുഴുവൻ കായികപ്രേമികൾക്കും അഭിമാനമായി മാറിയിരിക്കുകയാണ്. 2024 ഏപ്രിലിൽ നടന്ന കാൻഡിഡേറ്റ് ടൂർണമെന്റിൽ ലോകത്തെ മുൻനിര താരങ്ങളോട് ഏറ്റുമുട്ടി ചരിത്രം കുറിച്ച താരം കൂടിയാണ് ​ഗുകേഷ് ദൊമ്മരാജു.