ലോക ചെസ് ചാംപ്യൻഷിപ്പിൽ ചൈനീസ് താരം ഡിങ് ലിറനെ തോൽപിച്ച് ഇന്ത്യയുടെ യശസ് വാനോളം ഉയർത്തിയിരിക്കുകയാണ് ഡി. ഗുകേഷ് . പ്രധാനമന്ത്രി അടക്കമുള്ളവർ ഗുകേഷിനെ അഭിനന്ദിച്ച് രംഗത്തെത്തുകയും ചെയ്തു. എന്നാൽ ഇപ്പോൾ ചെസ്സ് പാപികള്‍ മാത്രം കളിക്കുന്ന കളിക്കുന്നതാണെന്നും , അള്ളാഹുവിന്റെ കോപം നേരിടേണ്ടി വരുമെന്നുമുള്ള സര്‍ക്കാര്‍ ഡോക്ടറുടെ കുറിപ്പ് വിമർശനത്തിനിടയാക്കുകയാണ്. കട്ടപ്പന താലൂക്ക് ആശുപത്രിയിലെ മെഡിക്കല്‍ ഓഫീസര്‍ ജാഹര്‍ ഷാഹൂലാണ് ചെസിനെതിരെ രംഗത്തെത്തിയത്.
ചെസ്സ് കളിക്കുന്നവർക്ക് അള്ളാഹുവിന്റെ അനുഗ്രഹമുണ്ടോ? മരണ ശേഷം അള്ളാഹുവിന്റെ മുമ്പില്‍ വിചാരണയ്‌ക്ക് നില്‍ക്കുമ്പോള്‍ ചെസ്സ് കളിച്ചതോണ്ട് ഇളവുകള്‍ ലഭിക്കുമോ എന്നൊക്കെയാണ് ഡോക്ടറുടെ ചോദ്യങ്ങൾ. ചൂതാട്ടം ഹറാമാണ് എന്നതില്‍ സംശയമില്ല. അത് കളിക്കുന്നവര്‍ അള്ളാഹുവിനെയും റസൂലിനെയും ധിക്കരിച്ചിരിക്കുന്നു . അത് കളിക്കുന്നവന്‍ അള്ളാഹു നിഷിദ്ധമാക്കിയ പന്നി ഇറച്ചി കഴിച്ചവനെ പോലെയാണെന്നുമൊക്കെയാണ് ഡോക്ടറുടെ കുറിപ്പ്.
ഫേസ്ബുക്ക് പോസ്റ്റിന്റെ പൂർണ്ണരൂപം …
ചെസ് എന്ന സാമൂഹിക വിപത്തിനെ ഇസ്‌ലാം എന്നേ തിരിച്ചറിഞ്ഞു!
എല്ലാവരും ഗുകേഷിന്റെയും ഇന്ത്യയുടെയും ലോക ചെസ്സ് ചാമ്പ്യന്‍ഷിപ് വിജയത്തിന്റെ ആഹ്ലാദത്തിലാണ്. തലങ്ങും വിലങ്ങും അഭിനന്ദനങ്ങളും അനുമോദനങ്ങളുടെയും ഇടയിലും തിരക്കിലും.
എല്ലാം സമ്മതിച്ചു, പക്ഷെ ഇനിയെന്ത്?
അള്ളാഹുവിന്റെ അനുഗ്രഹമുണ്ടോ?
മരണ ശേഷം അള്ളാഹുവിന്റെ മുമ്പില്‍ വിചാരണയ്‌ക്ക് നില്‍ക്കുമ്പോള്‍ ചെസ്സ് കളിച്ചതോണ്ട് ഇളവുകള്‍ ലഭിക്കുമോ?
ഇല്ല എന്നതാണ് ഉത്തരം. പകരം അള്ളാഹുവിന്റെ കോപം നേരിടേണ്ടി വരികയും ചെയ്യും.
ഇസ്‌ലാം വളരെയധികം വിമര്‍ശനാത്മക രീതിയിലാണ് ചെസ്സിനെ നോക്കി കാണുന്നത്.
ഒരിക്കല്‍ ഖലീഫ അലി (റ) ചെസ്സ് കളിക്കുന്ന ചിലരെ കണ്ടപ്പോള്‍ അവരോട് അതിനെ പറ്റി ചോദിച്ചു. ശേഷം കളിക്കാന്‍ ഉപയോഗിക്കുന്ന കരുക്കളെ വിഗ്രഹങ്ങളോട് താരതമ്യം ചെയ്യുകയും ചെയ്തു. ചെസ്സിനെ പറ്റി അലി പറഞ്ഞതാണ് ഏറ്റവും പ്രബലമായ അഭിപ്രായം എന്നാണ് ഇമാം അഹ്മദ് പറയുന്നത്.
സ്വഹാബിയായ അബ്ദുള്ള ഇബ്ന്‍ ഉമര്‍ (റ) പറഞ്ഞത് ചൂതാട്ടത്തെക്കാള്‍ മോശമായ ഒന്നാണ് ചെസ്സ് കളി.
മറ്റൊരു സ്വഹാബിയായ അബു മൂസ അല്‍–അഷ്’അരി ചെസ്സിനെ പറ്റി പറഞ്ഞത് ഇപ്രകരമാണ്: പാപികള്‍ മാത്രം കളിക്കുന്ന കളിയാണ് ചെസ്സ്.
ചൂതാട്ടം ഹറാമാണ് എന്നതില്‍ സംശയമില്ല.
അത് കളിക്കുന്നവര്‍ അള്ളാഹുവിനെയും അദ്ദേഹത്തിന്റെ റസൂലിനെയും ധിക്കരിച്ചിരിക്കിന്നു എന്നും അത് കളിക്കുന്നവന്‍ അള്ളാഹു നിഷിദ്ധമാക്കിയ പന്നി ഇറച്ചി കഴിച്ചവനെ പോലെയാണെന്നും എന്നൊക്കെയുള്ള സ്വഹീഹായ ഹദീസുകള്‍ ഉള്ളപ്പോള്‍ അതിലും വൃത്തികെട്ട കളിയായ ചെസ്സിനെ പ്പറ്റി പ്രത്യേകം പറയേണ്ടതുണ്ടോ?
മദ്ഹബിന്റെ പണ്ഡിതന്മാരായ ഇമാം അബു ഹനീഫ, ഇമാം മാലിക്ക്, ഇമാം അഹ്മദ് എന്നിവരെല്ലാം ചെസ്സിനെ ഹറാം ആയിട്ടാണ് കാണുന്നത്.
ഇമാം ഇബ്ന്‍ ഖുധാമ മുഘ്‌നിയിലും,
ഇമാം ഇബ്ന്‍ ഖയ്യിം അല്‍ ഫുരൂസിയയിലും ഇമാം അദ്ദഹാബി അല്‍–കബൈറിലും ചെസ്സിനെ ഹറാമായിട്ടാണ് കാണുന്നത്.
സാമ്പത്തിക നേട്ടത്തിന് വേണ്ടി ചെസ്സ് കളിക്കുന്നത് തീര്‍ത്തും നിഷിദ്ധമാണെന്നും അത് ചൂതാട്ടത്തിന് സമമാണ് എന്നാണ് ഇമാം ഇബ്ന്‍ അബ്ദുല്‍ ബര്‍ പറയുന്നത്.
ചെസിനെതിരെ ഇസ്‌ലാമില്‍ ഇനിയുമൊരുപാട് തെളിവുകളുണ്ട്.
ലോകം ഇത്രയും അധഃപതിച്ചല്ലോ!
നഊസൂ ബില്ല!
അള്ളാഹു എല്ലാവരെയും രക്ഷിക്കുമാറാകട്ടെ!
