തൃശൂർ: ഗുരുവായൂർ ക്ഷേത്രത്തിൽ വഴിപാടായി സ്വർണ നിവേദ്യക്കിണ്ണം സമർപ്പിച്ച് ചെന്നൈ സ്വദേശി. 25 ലക്ഷം രൂപ വിലമതിക്കുന്ന, 311 ഗ്രാം തൂക്കം വരുന്ന നിവേദ്യക്കിണ്ണമാണ് ഗുരുവായൂരപ്പന് സമർപ്പിച്ചത്. ചെന്നൈ സ്വദേശിയായ എം എസ് പ്രസാദാണ് വഴിപാട് നൽകിയത്. ക്ഷേത്രം ഡെപ്യൂട്ടി അഡ്മിനിസ്ട്രേറ്റർ പ്രമോദ് കളരിക്കൽ സ്വർണക്കിണ്ണം ഏറ്റുവാങ്ങി.
കുടുംബത്തോടൊപ്പമാണ് പ്രസാദ് ഗുരുവായൂർ ക്ഷേത്രത്തിലെത്തിയത്. ദർശനത്തിന് ശേഷം ക്ഷേത്രം അസിസ്റ്റന്റ് മാനേജർ കെ കെ സുഭാഷിന്റെ സാന്നിധ്യത്തിലാണ് പ്രസാദും കുടുംബവും സ്വർണക്കിണ്ണം ക്ഷേത്രം ഡെപ്യൂട്ടി അഡ്മിനിസ്ട്രേറ്റർക്ക് കൈമാറിയത്. ഏകദേശം 38. 93 പവൻ തൂക്കം വരുന്നതാണ് സ്വർണക്കിണ്ണം.
ഗുരുവായൂരപ്പന് ചാർത്തിയ കളഭം, പട്ട്, കദളിപ്പഴം, തിരുമുടിമാല, പഞ്ചസാര എന്നിവ അടങ്ങിയ പ്രസാദം ക്ഷേത്ര ഡെപ്യൂട്ടി അഡ്മിനിസ്ട്രേറ്റർ പ്രസാദിനും കുടുംബത്തിനും നൽകി.
