അടുക്കളയിൽ പണിയെടുത്ത് വരുന്നവരുടെ കൈകൾക്ക് എന്തെങ്കിലുമൊരു ഗന്ധമുണ്ടാകും. ഒന്നുകിൽ മീൻനാറ്റം. അല്ലെങ്കിൽ വെളുത്തുള്ളിയോ സവാളയോ അരിഞ്ഞതിന്റെ ഗന്ധം. ഇറച്ചി വൃത്തിയാക്കിട്ടുണ്ടെങ്കിൽ അതിന്റെ ഗന്ധവും കൈകളിൽ പെട്ടെന്ന് കയറിപിടിക്കും. സോപ്പും വെള്ളവും ഉപയോഗിച്ച് എത്ര കഴുകിയാലും ഈ ഗന്ധം പോകണമെന്നില്ല. രാവിലെ അടുക്കളപ്പണി കഴിഞ്ഞ് ജോലിക്ക് പോകുന്നവരാണെങ്കിൽ ഈ ദുർഗന്ധവും പേറി നടക്കേണ്ടി വരുന്നതും പ്രയാസമുണ്ടാക്കാറുണ്ട്. എന്നാൽ മിനിറ്റുകൾക്കുള്ളിൽ കൈകളിലെ ദുർഗന്ധം നീക്കാൻ ഇതാ ചില പൊടിക്കൈകൾ..
1. കൈകളിലേക്ക് അൽപം ഉപ്പ് വിതറുക. നല്ലപോലെ വിരലുകളും കൈപ്പത്തിയും ഗിച്ച് തേച്ചുരയ്ക്കുക. ശേഷം വെള്ളത്തിൽ കഴുകാം.. ഏതുഗന്ധവും പമ്പകടക്കും.
2. അൽപം മൗത്ത് വാഷോ, ടൂത്ത്പേസ്റ്റോ കൈകളിൽ പുരട്ടുക. നല്ലപോലെ ഉരയ്ക്കുക. അൽപ സമയത്തിന് ശേഷം കഴുകി കളയാം.
3. വെളുത്തുള്ളിയോ സവാളയോ അരിഞ്ഞതിന്റെ ഗന്ധം കൈകളിൽ നിന്ന് പോകാനുള്ള സൂത്രവിദ്യയാണ് സ്റ്റെയിൻലെസ് സ്റ്റീൽ. സ്റ്റെയിൻലെസ് സ്റ്റീൽ സ്പൂൺ എടുത്ത് കൈകളിൽ ഉരുട്ടുക. വെണ്ണ കടയുന്നതുപോലെയാണ് കൈകളിൽ സ്പൂൺ വച്ച് ഉരുട്ടേണ്ടത്. ശേഷം പൈപ്പിൻ ചുവട്ടിൽ വച്ചും ഇത്തരത്തിൽ ചെയ്യുക. കയ്യിലെ ഗന്ധം പോകുന്നത് വരെ ഇതുതുടരാം.
4. ചെറുനാരങ്ങാ നീര് കൈകളിൽ പുരട്ടി അൽപസമയത്തിന് ശേഷം കഴുകി കളഞ്ഞാലും ദുർഗന്ധം നീങ്ങും. അതുമല്ലെങ്കിൽ ഒരു കഷ്ണം ചെറുനാരങ്ങയെടുത്ത് കൈകളിൽ ഉരച്ചാലും മതി.
5. വിനാഗിരി അൽപമെടുത്ത് കൈകളിൽ പുരട്ടുക. കൈ ഡ്രൈ ആകുന്നതുവരെ കഴുകി കളയരുത്. വിനാഗിരി ഉണങ്ങിപ്പോകുന്നതിനൊപ്പം ദുർഗന്ധവും അപ്രത്യക്ഷമാകും.
6. അൽപം വെളിച്ചെണ്ണയെടുത്ത് കൈകളിൽ പുരട്ടിയാലും മീൻഗന്ധം പോകുന്നതാണ്.
