ഗുവാഹത്തി: ശൈശവ വിവാഹങ്ങൾക്കെതിരെ കർശന നടപടി തുടർന്ന് അസം സർക്കാർ. ശൈശവ വിവാഹം തടയാനുളള മൂന്നാംഘട്ട പരിശോധനയിൽ 416 പേരെ അറസ്റ്റ് ചെയ്തതായി മുഖ്യമന്ത്രി ഹിമന്ത ബിശ്വ ശർമ്മ പറഞ്ഞു. അറസ്റ്റിലായവരെ വൈകാതെ കോടതിയിൽ ഹാജരാക്കുമെന്നും അധികൃതർ അറിയിച്ചു.
” ശൈശവ വിവാഹത്തിനെതിരായ പോരാട്ടം അസം തുടരുന്നു. ഇതിനെതിരായ മൂന്നാം ഘട്ട ഓപ്പറേഷന്റെ ഭാഗമായി 416 പേരെ അറസ്റ്റ് ചെയ്യുകയും 335 കേസുകൾ രജിസ്റ്റർ ചെയ്യുകയും ചെയ്തിട്ടുണ്ട്. അന്വേഷണം മുന്നോട്ടുപോകും. ശൈശവ വിവാഹമെന്ന സാമൂഹിക തിന്മ അവസാനിക്കുന്നത് വരെ പോരാടും.”- ഹിമന്ത ബിശ്വശർമ്മ എക്‌സിൽ കുറിച്ചു.
2023 ഫെബ്രുവരിയിലും ഒക്ടോബറിലുമായി ശൈശവ വിവാഹത്തിനെതിരെ അസം സർക്കാർ നീക്കങ്ങൾ ആരംഭിച്ചിരുന്നു. ഫെബ്രുവരിയിൽ 3,483 പേരെ അറസ്റ്റ് ചെയ്യുകയും 4,515 കേസുകൾ രജിസ്റ്റർ ചെയ്യുകയും ചെയ്തിരുന്നു. ഒക്ടോബറിൽ 915 പേർക്കെതിരെയും നടപടി സ്വീകരിച്ചു. 710 കേസുകളായിരുന്നു രജിസ്റ്റർ ചെയ്തിരുന്നത്. താൻ മുഖ്യമന്ത്രിയായിരിക്കുന്നിടത്തോളം കാലം അസമിൽ ശൈശവ വിവാഹം നടത്താൻ അനുവദിക്കില്ലെന്നും ഹിമന്ത ബിശ്വശർമ്മ പറഞ്ഞു.
മുസ്ലീം പെൺകുട്ടികളുടെയും ആൺകുട്ടികളുടെയും ജീവിതം കൊണ്ട് കളിക്കാൻ ആരെയും അനുവദിക്കില്ല. 2026 ന് മുമ്പ് സംസ്ഥാനത്തെ ശൈശവ വിവാഹങ്ങൾക്ക് തടയിടും. 6-8 വയസുവരെ പ്രായമുള്ള കുട്ടികളെയാണ് ബലിയാടുകളാക്കുന്നത്. ഇതിന് കൂട്ടുനിൽക്കാൻ കോൺഗ്രസിന് നാണമില്ലേയെന്നും അദ്ദേഹം ചോദിച്ചു.
