“അപ്പോകാലിപ്സ് സിനിമയേക്കാൾ 1000 മടങ്ങ് ഭയാനകം”; 10 ഒളിമ്പിക് മെഡലുകളും വീടും ചാരമായ വേദനയിൽ നീന്തൽ താരം

അമേരിക്കൻ നീന്തൽ താരവും ഒളിമ്പ്യനുമായ ​ഗാരി ഹാൾ ജൂനിയർ തന്റെ കരിയറിൽ നേടിയത് പത്ത് ഒളിമ്പിക് മെഡലുകളായിരുന്നു. ഒരു കായികതാരത്തിന് സ്വന്തമാക്കാൻ കഴിയുന്ന ഏറ്റവും ഏറ്റവും വലിയ നേട്ടങ്ങളിലൊന്ന്. എന്നാൽ ആ പത്ത് മെഡലുകളും ഇപ്പോൾ ചാരമായിരിക്കുന്നു. ലോസ് ഏഞ്ചൽസിനെ വിഴുങ്ങിയ കാട്ടുതീ ​ഗാരിയുടെ ഒളിമ്പിക് നേട്ടവും കവർന്ന് കത്തിപ്പടരുകയാണ്..

കഴിഞ്ഞ 3-4 ദിവസമായി അമേരിക്കൻ നഗരമായ ലോസ് ഏഞ്ചൽസിൽ തുടരുന്ന കാട്ടുതീ പതിനായിരക്കണക്കിന് ഹെക്ടർ ഭൂമി ചാരമാക്കുകയും അത്രയുമേറെ വീടുകളും കെട്ടിടങ്ങളും ചാമ്പലാക്കുകയും ചെയ്തിരുന്നു. കുടുംബാംഗങ്ങളുമായി ഓടിരക്ഷപ്പെട്ടവരിൽ പാവപ്പെട്ടവരും പണക്കാരും സാധാരണക്കാരുമെല്ലാമുണ്ട്. ഇത്തരത്തിൽ കിടപ്പാടവും സ്വത്തുക്കളും നഷ്ടപ്പെട്ട പ്രമുഖരിൽ ഒരാളാണ് 50-കാരനായ ​ഗാരി.

ഒരുകാലത്ത് അമേരിക്കയുടെ അഭിമാനം വാനോളം ഉയർത്തിയ നീന്തൽ താരം. എല്ലാം നഷ്ടപ്പെട്ടവരിൽ അദ്ദേഹവുമുണ്ട്. സിഡ്നി മോണിം​ഗ് ഹെറാൾഡിന് നൽകിയ അഭിമുഖത്തിൽ ​ഗാരി ഹാൾ പറയുന്നത് പ്രകാരം പസഫിക് പാലിസേഡ്സിലുള്ള അദ്ദേഹത്തിന്റെ വാടകവീട് പൂർണമായും കത്തിയെരിഞ്ഞു. പത്ത് ഒളിമ്പിക് മെഡലുകളും നശിച്ചു. കുട്ടികളെ നീന്തൽ പഠിപ്പിച്ചിരുന്ന സ്വിമ്മിം​ഗ് പൂളടക്കമുള്ള എല്ലാം നഷ്ടപ്പെട്ടു. തന്റെ വളർത്തുനായയും കുറച്ച് വ്യക്തി​ഗത വസ്തുക്കളും മാത്രമാണ് വീടൊഴിയുന്ന സമയത്ത് ഒപ്പം കൂട്ടാനായതെന്നും അദ്ദേഹം പറയുന്നു.

നിങ്ങളിതുവരെ കണ്ടിട്ടുള്ള അപ്പോകാലിപ്സ് ചിത്രങ്ങളേക്കാൾ (apocalypse – ലോകാവസാനം പ്രമേയമായവ) ഭയാനകമാണ് കാര്യങ്ങൾ. അതിനേക്കാൾ ആയിരം മടങ്ങ് ദയനീയവും മോശവുമാണ് അവസ്ഥയെന്നും ​ഗാരി പ്രതികരിച്ചു. വീട്ടിൽ നിന്നിറങ്ങി രക്ഷപ്പെടാൻ നേരം മെഡലുകളെക്കുറിച്ച് ഓർത്തില്ല. എല്ലാം കത്തിപ്പടരാൻ തുടങ്ങിയിരുന്നു. ആ ഒളിമ്പിക് മെഡലുകൾ നഷ്ടപ്പെട്ടാലും തനിക്ക് ജീവിക്കാൻ കഴിയുമെന്ന് മനസിലാക്കുന്നു. എന്തൊക്കെ പറഞ്ഞാലും അതൊരു ഭൗതികവസ്തുവല്ലേ.. അതൊക്കെ വീണ്ടെടുക്കാൻ ഒരുപക്ഷെ പ്രയാസമായിരിക്കും, പക്ഷെ ഇതുപോലെയൊരു സാഹചര്യത്തിൽ എന്തുചെയ്യാനാകും? – ​ഗാരി ചോദിച്ചു.

ദക്ഷിണ കാലിഫോർണിയയെ ഏതാണ്ട് പൂർണമായും ചാമ്പലാക്കിയ കാട്ടുതീ ലക്ഷക്കണക്കിന് പേരെയാണ് അഭയാർത്ഥികളാക്കിയത്. ശക്തമായ വരണ്ട കാറ്റ് ഇടവേളകളില്ലാതെ വീശുന്നതിനാൽ തീയണക്കാനുള്ള ദൗത്യം ശ്രമകരമായി തുടരുകയാണ്. ലോസ് ഏഞ്ചൽസിലെ സമ്പന്ന ടൗണുകളും അ​ഗ്നിക്കിരയായതോടെ പ്രമുഖ ഹോളിവുഡ് താരങ്ങളടക്കം ഭവനരഹിതരായി. ഇതിനോടകം 11 പേർക്ക് ജീവൻ നഷ്ടപ്പെട്ടുവെന്നാണ് ഔദ്യോ​ഗിക കണക്കുകൾ സൂചിപ്പിക്കുന്നത്. വീടുകളും വ്യാപാരസ്ഥാപനങ്ങളുമടക്കം 12,000 കെട്ടിടങ്ങളും എരിഞ്ഞമർന്നു.