സാമുഹിക നിരീക്ഷകൻ രാഹുൽ ഈശ്വറിനെതിരെ പൊലീസിൽ പരാതി നൽകി ഹണി റോസ്. തന്റെ മൗലിക അവകാശങ്ങളെ നിഷേധിച്ചുകൊണ്ട് പൊതുയിടങ്ങളിൽ തന്നെ അപമാനിച്ചുവെന്നും ബോബി ചെമ്മണ്ണൂരിനെതിരെ താൻ കൊടുത്ത ലൈംഗികാധിക്ഷേപ പരാതിയുടെ ഗൗരവം ചേർത്തിക്കളഞ്ഞ്, ജനങ്ങളുടെ പൊതുബോധം തനിക്കെതിരെ തിരിക്കാൻ മനഃപൂർവ്വം ശ്രമിച്ചെന്നും ചൂണ്ടിക്കാട്ടിയാണ് രാഹുൽ ഈശ്വറിനെതിരെ പരാതി നൽകിയത്. രാഹുൽ ഈശ്വറിനെതിരെ നിയമനടപടി സ്വീകരിക്കുന്നുവെന്ന് അറിയിച്ചുകൊണ്ട് ഹണി റോസ് ഫെയ്സ്ബുക്കിൽ പോസ്റ്റ് പങ്കുവച്ചിട്ടുണ്ട്.
തുടർച്ചയായി മാദ്ധ്യമങ്ങളിലൂടെ തനിക്കെതിരെയും തന്റെ മൗലിക അവകാശങ്ങൾക്കെതിരെയും നിയന്ത്രണം ഏർപ്പെടുത്തി, പൊതുബോധം സൃഷ്ടിച്ച് തന്നെ ആക്രമിക്കാൻ ശ്രമിക്കുകയാണെന്നും ഇത് കാരണം താനും കുടുംബവും കടുത്ത മാനസിക സംഘർഷത്തിലാണെന്നും ഹണി റോസ് ഫെയ്സ്ബുക്കിൽ കുറിച്ചു. തന്നെ കടുത്ത മാനസികവ്യഥയിലേക്കും ആത്മഹത്യയിലേക്കും തള്ളിവിടാനാണ് രാഹുൽ ഈശ്വർ ശ്രമിക്കുന്നതെന്നും ഹണി റോസ് പറയുന്നു.
ബോബി ചെമ്മണ്ണൂരിനെതിരെ കേസെടുത്തതിന് പിന്നാലെ വസ്ത്രധാരണത്തിന്റെ പേരിൽ ഹണി റോസിനെ പരസ്യമായി രാഹുൽ ഈശ്വർ അധിക്ഷേപിച്ചിരുന്നു. ചാനൽ ചർച്ചകളിലൂടെയും സമൂഹമാദ്ധ്യമങ്ങളിലൂടെയും ഹണി റോസിനെതിരെ വിമർശനം ഉന്നയിക്കുകയും ചെയ്തിരുന്നു. ഇതിന് പിന്നാലെയാണ് പരാതിയുമായി ഹണി റോസ് രംഗത്തെത്തിയത്. രാഹുൽ ഈശ്വർ മാപ്പർഹിക്കുന്നില്ലെന്ന് പറഞ്ഞാണ് താരം കുറിപ്പ് അവസാനിപ്പിക്കുന്നത്.
