തൊട്ടുരുമ്മി ചേസറും ടാർ​ഗറ്റും; അകലം വെറും 230 മീറ്റർ മാത്രം; കഴിഞ്ഞ തവണ ‘പാളിയത്’ ഇത്തവണ വിജയം കണ്ടു

ബെം​ഗളൂരു: സ്‌പെയ്‌ഡെക്സ് ദൗത്യത്തിലെ ഉപ​ഗ്രഹങ്ങൾ തമ്മിലുള്ള ദൂരപരിധി വീണ്ടും കുറച്ചതായി ഇസ്രാ. നിലവിൽ 230 മീറ്റർ അകലത്തിലാണ് ഉപ​ഗ്രഹങ്ങളുള്ളത്. ഉപ​​ഗ്രഹങ്ങളുടെ സെൻസറുകൾ വിലയിരുത്തുകയാണെന്നും പേടകങ്ങൾ‌ സുരക്ഷിതമാണെന്നും ഐഎസ്ആർ‌ഒ അറിയിച്ചു. ഡോക്കിം​ഗ് ചെയ്യുന്ന ദിവസമോ സമയോ ഇസ്രോ പുറത്തുവിട്ടിട്ടില്ലെന്നതും ശ്രദ്ധേയമാണ്.

ഇന്ന് രണ്ട് തവണയാണ് പേടകങ്ങളെ അടുപ്പിച്ചത്. ഇന്നലെ പേടകങ്ങളെ 1.5 കിലോമീറ്റർ പരിധിയിൽ ​ഹോ‌ൾഡ് മോഡിൽ നിർത്തിയിരിക്കുകയായിരുന്നു. ഇന്ന് ഉച്ചയോടെ ഉപ​ഗ്രഹങ്ങൾ തമ്മിലുള്ള അകലം 500 മീറ്ററാക്കി കുറച്ചു. ഇതിന് ശേഷമാണ് 230 അകലത്തിലേക്ക് പേടകങ്ങളെ എത്തിച്ചത്. ഇനി 225 മീറ്ററിലേക്ക് എത്തിക്കുകയാണ് ലക്ഷ്യം. നേരത്തെ ഡോക്കിം​ഗിൽ സാങ്കേതിക പ്രശ്നം നേരിട്ട ഘട്ടമാണ് ഇപ്പോൾ വിജയകരമായി പിന്നിട്ടിരിക്കുന്നത്. ഓരോ പടിയും വളരെ കരുതലോടെയാണ് ഇസ്രോ നടത്തുന്നത്.