വത്തിക്കാൻ സിറ്റി: ഫ്രാൻസിസ് മാർപാപ്പയ്‌ക്ക് പരിക്കേറ്റെന്ന് റിപ്പോർട്ട്. മാർപാപ്പയുടെ വസതിയായ സാന്റ മാർത്ത ഹൗസിൽ വച്ചുണ്ടായ വീഴ്ചയിലാണ് പരിക്കേറ്റത്. വലതുകൈത്തണ്ടയ്‌ക്ക് നിസാരമായ പരിക്കാണുള്ളതെന്നും എല്ലുകൾക്ക് പൊട്ടലില്ലെന്നും വത്തിക്കാൻ അറിയിച്ചു.
കഴിഞ്ഞ ഡിസംബറിൽ മാർപാപ്പയ്‌ക്ക് സമാനമായ വീഴ്ച സംഭവിച്ചിരുന്നു. കിടക്കയിൽ നിന്നായിരുന്നു വീണത്. തുടർന്ന് മാർപാപ്പയുടെ വലതുതാടിക്ക് ചതവ് സംഭവിച്ചു. ഇതിന് ശേഷം ഏതാനും ആഴ്ചകൾ പിന്നിടുമ്പോഴാണ് രണ്ടാമത്തെ വീഴ്ച.
88 വയസാണ് മാർപാപ്പയ്‌ക്ക്. കഴിഞ്ഞ ഏതാനും വർഷങ്ങളായി വാർദ്ധക്യ സഹജമായ അസുഖങ്ങൾ അദ്ദേഹത്തിനുണ്ട്. ഇടുപ്പിനും മുട്ടിനും അസഹ്യമായ വേദനയുള്ളതിനാൽ കഴിഞ്ഞ കുറേ നാളുകളായി ചികിത്സയിലാണ്. ശ്വാസനാളവീക്കവുമുണ്ട്. അതിനാൽ 2022 മുതൽ വീൽചെയറിലാണ് അദ്ദേഹം.
