കൊച്ചി: നടിയുടെ പരാതിയിൽ രാഹുൽ ഈശ്വറിനെതിരെ കേസെടുത്തിട്ടില്ലെന്ന് പോലീസ് ഹൈക്കോടതിയിൽ ബോധിപ്പിച്ചു.രാഹുലിനെതിരെ നടി നൽകിയ പരാതിയിൽ പ്രാഥമികാന്വേഷണം നടക്കുന്നുവെന്നും പോലീസ് ഹൈക്കോടതിയിൽ റിപ്പോർട്ട് നൽകി.
രാഹുലിന്റെ മുന്കൂര് ജാമ്യാപേക്ഷ പരിഗണിക്കുന്നതിനിടെയാണ് പൊലീസ് ഇക്കാര്യം കോടതിയെ അറിയിച്ചത്.
അധിക്ഷേപ പരാമർശം നടത്തിയെന്ന നടിയുടെ പരാതിയിൽ രാഹുൽ ഈശ്വറിനെതിരെ കേസെടുക്കാൻ കഴിയില്ലെന്ന് പൊലീസ് നേരത്തെ അറിയിച്ചിരുന്നു . നിലവിലെ പരാതിയിൽ കേസെടുക്കാൻ വകുപ്പുകളില്ലെന്നും നടി കോടതി വഴി പരാതി നൽകണമെന്നും കൊച്ചി പൊലീസ് അറിയിക്കുകയായിരുന്നു.
വിശദമായ നിയമോപദേശം തേടുമെന്നും പൊലീസ് നടിയെ അറിയിച്ചിരുന്നു. നടിക്ക് കോടതി വഴി പരാതി നല്കാമെന്നും കൊച്ചി പൊലീസ് വ്യക്തമാക്കിയിരുന്നു.
ബോബി ചെമ്മണൂർ വിവാദത്തിൽ നടിയെ വിമര്ശിച്ച് രാഹുല് ഈശ്വര് രംഗത്തെത്തിയിരുന്നു. ചാനല് ചര്ച്ചകളില് പങ്കെടുക്കവെ രാഹുല് നടത്തിയ പരാമര്ശങ്ങളിലാണ് നടി എറണാകുളം സെന്ട്രല് പൊലീസില് പരാതി നല്കിയത്.
വിഷയത്തിൽ നടത്തിയ പരാമര്ശങ്ങളില് രാഹുല് ഈശ്വറിനെതിരെ സംസ്ഥാന യുവജന കമ്മിഷന് കേസെടുത്തിരുന്നു. സ്ത്രീത്വത്തെ നിരന്തരമായി വാര്ത്ത ചാനലുകളിലൂടെ അപമാനിക്കുകയും സ്ത്രീ വിരുദ്ധ പരാമര്ശങ്ങള് പ്രചരിപ്പിക്കുന്നതായും ചൂണ്ടിക്കാട്ടി ‘ദിശ’ എന്ന സംഘടന നല്കിയ പരാതിയിലായിരുന്നു നടപടി.
