വാർദ്ധക്യാവസ്ഥയിൽ സിനിമാതാരങ്ങൾക്ക് താമസിക്കാൻ ഗ്രാമമുണ്ടാക്കാൻ താരസംഘടനയായ അമ്മ. മോഹൻലാലിന്റെ ആശയം നടപ്പിലാക്കാനുള്ള ശ്രമങ്ങൾ ആരംഭിച്ചതായി നടൻ ബാബുരാജ് പറഞ്ഞു. റിപ്പബ്ലിക് ദിനത്തിൽ സംഘടന ആരംഭിച്ച സഞ്ജീവനി ജീവന്‍രക്ഷാപദ്ധതിയുടെ ഉദ്‌ഘാടന പരിപാടിയിൽ സംസാരിക്കുകയായിരുന്നു താരം.
“നമുക്ക് നമ്മുടേതായ ഗ്രാമമെന്ന ആശയം ലാലേട്ടന്റേതാണ്. നമുക്കെല്ലാം വയസായിക്കഴിഞ്ഞാൽ ഒരുമിച്ച് ജീവിക്കാൻ പറ്റിയ ഗ്രാമം ഉണ്ടാക്കണം. അതിനുള്ള പ്രയത്നം തുടങ്ങിക്കഴിഞ്ഞു,” ബാബുരാജ് പറഞ്ഞു. സർക്കാരുമായി സംസാരിച്ച് ഗ്രാമത്തിനായി സ്ഥലം കണ്ടെത്തണമെന്നും തമിഴ്‍നാട് സർക്കാരും സമാന പദ്ധതികൾക്ക് ശ്രമിച്ചിരുന്നെങ്കിലും അവ നടപ്പിലായിട്ടില്ലെന്നും പിന്നീട് സംസാരിച്ച മോഹൻലാൽ പറഞ്ഞു.
പരിപാടിയിൽ മമ്മൂട്ടിയും സുരേഷ്‌ഗോപിയും ശ്രീനിവാസനും മഞ്ജു വാര്യരുമടക്കമുള്ള പ്രമുഖ താരങ്ങൾ വിശിഷ്ടാതിഥികളായിരുന്നു. സംഘടനയിലെ 82 അംഗങ്ങൾക്ക് സ്ഥിരമായി ജീവിതശൈലി രോഗങ്ങൾക്കും മറ്റ് ജീവൻരക്ഷാ മരുന്നുകളും ലഭ്യമാക്കാനുള്ള പദ്ധതിയുടെ ഉദ്‌ഘാടനമാണ് കഴിഞ്ഞ ദിവസം നടന്നത്. സഞ്ജീവനി പദ്ധതിയിലൂടെ സംഘടനയിലെ ഓരോ അംഗങ്ങൾക്കും ഒരു ലക്ഷം രൂപയുടെ മരുന്നാണ് വിതരണം ചെയ്യുന്നത്.
