ന്യൂഡൽഹി: രാജ്യതലസ്ഥാനത്ത് ആർഎസ്എസിന്റെ പുതിയ കാര്യാലയം ഉയർന്നു. ഝണ്ടേവാലയിൽ പഴയ കാര്യാലയമായിരുന്ന കേശവ് കുഞ്ചാണ് ആധുനിക സൗകര്യങ്ങളോടെ പുനർ നിർമിച്ചത്. ശിവജി ജയന്തി ദിനമായ ഫെബ്രുവരി 19ന്, നടക്കുന്ന സമർപ്പണ ചടങ്ങിൽ സർസംഘചാലക് ഡോ. മോഹൻ ഭാഗവത്, സർകാര്യവാഹ് ദത്താത്രേയ ഹൊസബളെ എന്നിവർ സംബന്ധിക്കും.
5 ലക്ഷം ചതുരശ്ര അടി വിസതീർണ്ണമുള്ള സമുച്ചയം എട്ട് വർഷം കൊണ്ടാണ് പൂർത്തിയാക്കിയത്. ആധുനിക സാങ്കേതിക വിദ്യയും പുരാതന വാസ്തുവിദ്യാരീതികളും സംയോജിപ്പിച്ചാണ് കെട്ടിടം നിർമിച്ചിരിക്കുന്നത്.
12 നിലകളിലായി 3 ഓഡിറ്റോറിയങ്ങൾ, 300 ഓളം മുറികൾ, 8,500 പുസ്തകങ്ങളുള്ള ലൈബ്രറി, ആശുപത്രി, ഹനുമാൻ ക്ഷേത്രം എന്നിവ കാര്യാലയത്തിൽ സജ്ജീകരിച്ചിട്ടുണ്ട്. ദൈനംദിന ശാഖകൾ നടത്താനുള്ള സൗകര്യവും ഉണ്ട്. നിലവിൽ 135 കാറുകൾ പാർക്ക് ചെയ്യാം, ഭാവിയിൽ ഇത് 270 കാറുകളായി വികസിപ്പിക്കാനുള്ള ശേഷിയും ഉണ്ട്.
പൂർണ്ണമായും പരിസ്ഥിതി സൗഹൃദമായാണ് കെട്ടിടത്തിന്റെ നിർമ്മാണം. തടിയുടെ ഉപയോഗം പൂർണ്ണമായും ഒഴിവാക്കിയിട്ടുണ്ട്. വൈദ്യുതി ഉൽപ്പാദിപ്പിക്കാൻ സോളാർ പാനലുകൾ, വിപുലമായ മാലിന്യ സംസ്കരണ സംവിധാനങ്ങൾ എന്നിവ ഒരുക്കിയിട്ടുണ്ട്.
ആർ‌എസ്‌എസ് കാര്യകർത്താക്കളുടെയും സംഘവുമായി ബന്ധപ്പെട്ടവരിൽ നിന്നും മാത്രം സമാഹരിച്ച തുക കൊണ്ടാണ് നിർമാണം പൂർത്തിയാക്കിയത്. 75,000 ത്തോളം ആളുകൾ ധനസമാഹരണത്തിൽ പങ്കാളികളായി. 150 കോടി രൂപയാണ് നിർമ്മാണ ചെലവ്.
#WATCH | Delhi | The new headquarters of the Rashtriya Swayamsevak Sangh (RSS), ‘Keshav Kunj,’ has been completed in Delhi. The RSS has shifted its office back to its old address in the city. The reconstruction project spans 3.75 acres and consists of three 12-story buildings,… pic.twitter.com/vOkojE4FGE
— ANI (@ANI) February 12, 2025
നാല് ഏക്കർ സ്ഥലത്താണ് കേശവ് കുഞ്ച് വ്യാപിച്ച് കിടക്കുന്നത്. മനോഹരമായി അലങ്കരിച്ച പുൽത്തകിടിയിൽ പ്രഥമ സർസംഘചാലക് പൂജനീയ ഡോ.
കേശവ ബലിറാം ഹെഡ്‌ഗേവാറിന്റെ പ്രതിമ സ്ഥാപിച്ചിട്ടുണ്ട്. സാധന, പ്രേരണ, അർച്ചന എന്നിങ്ങനെ മൂന്ന് ടവറുകളാണുള്ളത്. ഓഫീസുകളാണ് സാധനയിൽ പ്രവർത്തിക്കുന്നത്. പ്രേരണയും അർച്ചനയും റെസിഡൻഷ്യൽ കോംപ്ലക്സുകളാണ്.
1939 ലാണ് ഡൽഹിയിലെ കാര്യാലയം പ്രവർത്തനം ആരംഭിച്ചത്. കാലപ്പഴക്കത്തെ തുടർന്ന് 2016 ഓഗസ്റ്റിലാണ് പുതിയ കെട്ടിടത്തിന്റെ തറക്കല്ലിട്ടത്. മാർച്ച് 21 മുതൽ 23 വരെ ബെംഗളൂരുവിൽ നടക്കുന്ന അഖില ഭാരതീയ പ്രതിനിധി സഭ ബൈഠക്കിന് മുന്നോടിയായി ഫെബ്രുവരി 19 ന് പുതിയ ആസ്ഥാനത്ത് സർസംഘചാലക് മോഹൻ ഭഗവത് പങ്കെടുക്കുന്ന കാര്യകർത്താ മിലൻ സംഘടിപ്പിക്കും.
