ദൃശ്യം സിനിമയ്‌ക്ക് മൂന്നാം ഭാഗം വരുന്നത് സംബന്ധിച്ച് നിരവധി അഭ്യൂഹങ്ങളാണ് ഉയർന്നിരുന്നത്. ”നല്ല കഥ” വന്നാൽ തീർച്ചയായും പരിഗണിക്കുമെന്ന് സംവിധായകൻ ജീത്തു ജോസഫ് ഉറപ്പുനൽകിയിരുന്നെങ്കിലും ദൃശ്യം മൂന്നിന്റെ പ്രഖ്യാപനം ഇതുവരെ ഉണ്ടായിരുന്നില്ല. എന്നാലിപ്പോൾ സാക്ഷാൽ മോഹൻലാൽ തന്നെ ഇക്കാര്യം സ്ഥിരീകരിച്ചിരിക്കുകയാണ്. ദൃശ്യം 3 വരുന്നു..
സംവിധായകൻ ജീത്തുവിനും നിർമാതാവ് ആന്റണി പെരുമ്പാവൂരിനുമൊപ്പം നിൽക്കുന്ന ചിത്രം പങ്കുവച്ചാണ് ദൃശ്യം-3ന്റെ അനൗൺസ്മെന്റ് മോഹൻലാൽ നടത്തിയത്. “ഭൂതകാലം ഒരിക്കലും നിശബ്ദമായിരിക്കില്ല” (The Past Never Stays Silent) എന്ന അടിക്കുറിപ്പും മോഹൻലാൽ നൽകിയിട്ടുണ്ട്..
2013-ലായിരുന്നു ദൃശ്യത്തിന്റെ ആദ്യഭാഗം റിലീസ് ചെയ്തത്. 150 ദിവസത്തോളം തീയേറ്ററിൽ നിറഞ്ഞോടിയ ചിത്രം വലിയ ജനപ്രീതിയും പ്രേക്ഷകപ്രശംസയും നേടിയിരുന്നു. സാധാരണക്കാരന്റെ ജീവിതം ത്രില്ലർ ജോണറിൽ അവതരിപ്പിച്ച് ജീത്തു ജോസഫും കയ്യടി നേടി. മോഹൻലാലിനൊപ്പം മീനയായിരുന്നു പ്രധാന വേഷത്തിലെത്തിയത്. ആശാ ശരത്ത് അവതരിപ്പിച്ച പൊലീസ് കഥാപാത്രവും ഏറെ ചർച്ചയായി. ആന്റണി പെരുമ്പാവൂരായിരുന്നു നിർമാണം. വൻലാഭം നേടിയ ദൃശ്യത്തിന്റെ രണ്ടാം ഭാഗം കൊവിഡ് കാലത്താണ് പുറത്തിറങ്ങിയത്.
2021 ഫെബ്രുവരി 19ന് ആമസോൺ പ്രൈമിലൂടെ ഒടിടി റിലീസ് ചെയ്ത ദൃശ്യം-2 പ്രേക്ഷകരുടെ പ്രതീക്ഷകളെ തൃപ്തിപ്പെടുത്തുന്നതായിരുന്നു. ദൃശ്യം ഒന്നിന്റെ ക്ലൈമാക്സ് ട്വിസ്റ്റാണ് ഗംഭീരമായതെങ്കിൽ, രണ്ടാം ഭാഗത്തിൽ രണ്ടാം പകുതിയാണ് സ്കോർ ചെയ്തത്. അവിടെയും തിരക്കഥ തന്നെയായിരുന്നു താരം. ദൃശ്യം-2ൽ മുരളി ഗോപിയും പ്രധാന കഥാപാത്രമായെത്തി. ദൃശ്യം 3 പ്രതീക്ഷിക്കാമെന്ന സൂചന നൽകിയാണ് രണ്ടാം ഭാഗം അവസാനിപ്പിച്ചതും. നാല് വർഷത്തിനൊടുവിൽ മൂന്നാം ഭാഗം വരുമെന്ന അനൗൺസ്മെന്റ് മോഹൻലാൽ നടത്തുമ്പോൾ വമ്പൻ പ്രതീക്ഷകളാണ് ആരാധകർക്കുമുള്ളത്.
