മാർക്കോയ്‌ക്ക് ശേഷം നിർമാതാവ് ഷരീഫ് മുഹമ്മദ് നിർമിക്കുന്ന പുതിയ സിനിമയുടെ പോസ്റ്റർ പുറത്തിറങ്ങി. കാട്ടാളൻ എന്നാണ് ചിത്രത്തിന് പേരിട്ടിരിക്കുന്നത്. ഷെരീഫ് മുഹമ്മദിന്റെ ഇൻസ്റ്റഗ്രാമിലൂടെയാണ് പോസ്റ്റർ റിലീസ് ചെയ്തത്. വയലൻസ് സിനിമയെന്ന് വ്യക്തമാക്കുന്ന പോസ്റ്ററാണ് എത്തിയത്. ആന്റണി പെപ്പെയാണ് കാട്ടാളനിലെ നായകൻ.
ആളിക്കത്തുന്ന അഗ്നിക്ക് മുമ്പിൻ പെപ്പെ നിൽക്കുന്നതാണ് പോസ്റ്ററിലുള്ളത്. ക്യൂബ്സ് എന്റർടെയിൻമെന്റ്സിന്റെ ബാനറിലാണ് ചിത്രത്തിന്റെ നിർമാണം. വയലൻസ് സിനിമകൾ വിവാദമാകുന്ന സാഹചര്യത്തിലാണ് അതേ ജോണറിൽ പുതിയൊരു സിനിമ കൂടി എത്തുന്നത് എന്നതും ശ്രദ്ധേയമാണ്.
പോസ്റ്ററിന് പിന്നാലെ വിമർശിച്ചും പ്രശംസിച്ചും ആളുകൾ കമന്റ് ബോക്സിൽ എത്തി. പെപ്പെയുടെ പ്രകടനം കാണാൻ കാത്തിരിക്കുന്നുവെന്നാണ് ഭൂരിഭാഗം പ്രേക്ഷകരും പറയുന്നത്. പ്രൊഡക്ഷൻ നമ്പർ 2 എന്ന പേരിൽ ചിത്രത്തിന്റെ അനൗസ്മെന്റ് പോസ്റ്റർ ക്യൂബ്സ് പ്രൊഡക്ഷൻ നേരത്തെ പുറത്തുവിട്ടിരുന്നു.
നവാഗതനായ പോൾ ജോർജാണ് ചിത്രം സംവിധാനം ചെയ്യുന്നത്. മാർക്കോയുടെ ഹിറ്റിന് പിന്നാലെയാണ് ഏറെ പ്രതീക്ഷയോടെ പുതിയ ചിത്രത്തിനായി ഷെരീഫ് മുഹമ്മദ് തയാറെടുക്കുന്നത്.
