ന്യൂഡൽഹി: സ്പേഡെക്സ് ദൗത്യത്തിന്റെ ഭാഗമായി ഉപഗ്രഹങ്ങളുടെ അൺഡോക്കിംഗ് വിജയകരമായി പൂർത്തിയാക്കി ഇസ്രോ. ഇന്ത്യയുടെ ബഹിരാകാശ പര്യവേക്ഷണ യാത്രയിൽ നിർണായകമായ ചുവടുവെപ്പാണിത്.
രണ്ട് ഉപഗ്രഹങ്ങളെ തമ്മിൽ ബന്ധിപ്പിക്കുന്ന ഡോക്കിംഗും അവയെ വേർപ്പെടുത്തുന്ന അൺ‌ഡോക്കിംഗും ചേർന്നതാണ് ഇസ്രോയുടെ സ്പേസ് ഡോക്കിംഗ് പരീക്ഷണ ദൗത്യമായ സ്പേഡെക്സ് (SpaDeX). SDX-01, SDX-02 എന്നീ ഉപഗ്രഹങ്ങളെ വേർപ്പെടുത്തുന്ന അൺഡോക്കിംഗ് ദൗത്യമാണ് ഇപ്പോൾ വിജയകരമായി പൂർത്തിയാക്കിയത്.
2024 ഡിസംബർ 30നായിരുന്നു SpaDeX ദൗത്യം വിക്ഷേപിച്ചത്. ഉപഗ്രഹങ്ങളുടെ ഒത്തുചേരൽ, ഡോക്കിംഗ്, അൺഡോക്കിംഗ് എന്നിവ ഘട്ടം ഘട്ടമായി പരീക്ഷിക്കുന്നതിനുള്ള ദൗത്യമാണ് SpaDeX. കഴിഞ്ഞ ജനുവരിയിലാണ് ഡോക്കിംഗ് പ്രക്രിയ നടന്നത്. ഇതിന് മുന്നോടിയായി 15 മീറ്റർ ദൂരവ്യത്യാസത്തിൽ ഇരു ഉപഗ്രഹങ്ങളും നിലയുറപ്പിച്ചിരുന്നു.
വളരെ സങ്കീർണമായ ദൗത്യമായാണ് ഡോക്കിംഗ്, അൺഡോക്കിംഗ് പ്രക്രിയയെ കണക്കാക്കുന്നത്. കൂട്ടിയിടി ഒഴിവാക്കി രണ്ട് ഉപഗ്രഹങ്ങളെ ഡോക്ക് ചെയ്യുകയെന്നതാണ് വെല്ലുവിളി. ഇന്ത്യയുടെ സ്വന്തം ബഹിരാകാശ സ്റ്റേഷൻ, ചന്ദ്രയാൻ-4, ഗഗൻയാൻ എന്നിവ ഉൾപ്പെടെയുള്ള വൻ ദൗത്യങ്ങളുടെ ശോഭനമായ ഭാവിക്ക് വഴിയൊരുക്കുന്നതാണ് സ്പേഡെക്സ് ദൗത്യമെന്നാണ് വിലയിരുത്തൽ.
