ന്യൂഡൽഹി: മുദ്ര യോജനയുടെ പത്താം വാർഷിക ആഘോഷ വേളയിൽ പദ്ധതിയുടെ ഗുണഭോക്താക്കളെ അഭിനന്ദിച്ച് പ്രധാനമന്ത്രി നരേന്ദ്രമോദി. പദ്ധതി ലക്ഷക്കണക്കിന് ജനങ്ങളെ ശാക്തീകരിക്കുവാനും അവരുടെ സ്വപ്നങ്ങളെ യാഥാർഥ്യമാക്കാനും സഹായിച്ചുവെന്ന് പ്രധാനമന്ത്രി എക്സിൽ കുറിച്ചു.
“ഇന്ന്, മുദ്രയുടെ 10 വർഷങ്ങൾ ആഘോഷിക്കുമ്പോൾ, ഈ പദ്ധതിയിലൂടെ ജീവിതം മാറ്റിമറിച്ച എല്ലാവരെയും ഞാൻ അഭിനന്ദിക്കുന്നു. ഈ ദശകത്തിൽ, മുദ്ര യോജന നിരവധി സ്വപ്നങ്ങളെ യാഥാർത്ഥ്യമാക്കി. മുമ്പ് പിന്നാക്കം നിന്നിരുന്ന ആളുകളെ സാമ്പത്തിക സഹായം നൽകി ശാക്തീകരിച്ചു. ഇന്ത്യയിലെ ജനങ്ങൾക്ക് അസാധ്യമായി ഒന്നുമില്ലെന്ന് ഇത് വ്യക്തമാക്കുന്നു!” പ്രധാനമന്ത്രി കുറിച്ചു.
ഓരോ മുദ്ര വായ്പയും ജനങ്ങൾക്ക് അന്തസും, ആത്മാഭിമാനവും, അവസരവും നൽകി. സാമ്പത്തികവും സാമൂഹ്യവുമായ സ്വാതന്ത്ര്യം ഉറപ്പാക്കി. മുദ്രാ ഗുണഭോക്താക്കളിൽ പകുതിയും എസ്‌സി, എസ്ടി, ഒബിസി സമുദായങ്ങളിൽ പെട്ടവരാണെന്നും 70%-ത്തിലധികം ഗുണഭോക്താക്കളും സ്ത്രീകളാണെന്നും മോദി ചൂണ്ടിക്കാട്ടി. പരാശ്രയമായല്ലാതെ ജീവിക്കാൻ ആഗ്രഹിക്കുന്ന സംരംഭകർക്ക് വേണ്ട സഹായങ്ങൾ ഉറപ്പാക്കാൻ കേന്ദ്രസർക്കാർ തുടർന്നും പ്രവർത്തിക്കുമെന്ന് പ്രധാനമന്ത്രി കൂട്ടിച്ചേർത്തു.
Mudra Yojana has given opportunities to countless people to showcase their entrepreneurial skills. Interacted with some of the beneficiaries of the scheme. Their journey is inspiring. #10YearsOfMUDRA https://t.co/QcoIK1VTki
— Narendra Modi (@narendramodi) April 8, 2025
ആവശ്യത്തിന് മൂലധനമില്ലാതെഹ് ബുദ്ധിമുട്ടുന്ന ചെറുകിട ബിസിനസുകൾക്കും സംരംഭങ്ങൾക്കും ധനസഹായം നൽകുക എന്ന ലക്ഷ്യത്തോടെയാണ് പ്രധാനമന്ത്രിയുടെ ഫ്ലാഗ്ഷിപ്പ് പദ്ധതിയായ പ്രധാനമന്ത്രി മുദ്രാ യോജന നടപ്പിലാക്കിയത്. പദ്ധതി പത്താം വർഷത്തിലേക്ക് കടക്കുന്ന വേളയിൽ മോദി ഇന്ന് മുദ്ര യോജന ഗുണഭോക്താക്കളുമായി ചർച്ച നടത്തും.
