ന്യൂഡൽഹി: രാജ്യത്തെ യുവാക്കൾക്ക് അവരുടെ ആരോഗ്യത്തിൽ ശ്രദ്ധ കേന്ദ്രീകരിക്കാൻ പ്രചോദനം നൽകി കേന്ദ്ര ആഭ്യന്തരമന്ത്രി അമിത് ഷാ. ആരോഗ്യമുള്ള ജീവിത ശൈലി 40-50 വർഷം കൂടുതൽ ജീവിക്കാനും രാജ്യത്തിന്റെ പുരോഗതിക്ക് സംഭാവന നൽകാനും അവരെ സഹായിക്കുമെന്ന് അദ്ദേഹമാണ് പറഞ്ഞു. ശരീരഭാരം കുറച്ച് ഫിറ്റ്നസിലേക്കുള്ള തന്റെ യാത്രയെ അനുസ്മരിച്ചുകൊണ്ടായിരുന്നു അമിത്ഷായുടെ വാക്കുകൾ.
ഭക്ഷണക്രമത്തിൽ മാറ്റം വരുത്തുക, ഉറക്കത്തിന്റെ സമയം വർദ്ധിപ്പിക്കുക, ദിവസേനയുള്ള വ്യായാമം ചെയ്യുക എന്നിവ മാത്രമാണ് തനിക്ക് വേണ്ടിയിരുന്നതെന്ന് അമിത് ഷാ പറഞ്ഞു.
“ആവശ്യമായ ഉറക്കം, വെള്ളം, ഭക്ഷണക്രമം, പതിവ് വ്യായാമം എന്നിവ എനിക്ക് ധാരാളം കാര്യങ്ങൾ നൽകി… ഇന്ന്, എല്ലാത്തരം അലോപ്പതി മരുന്നുകളിൽ നിന്നും ഇൻസുലിനിൽ നിന്നും മുക്തനായി ഞാൻ നിങ്ങളുടെ മുന്നിൽ നിൽക്കുന്നു,” ലോക കരൾ ദിനത്തിൽ ഡൽഹിയിൽ ഇൻസ്റ്റിറ്റ്യൂട്ട് ഓഫ് ലിവർ ആൻഡ് ബിലിയറി സയൻസസ് സംഘടിപ്പിച്ച ഒരു പരിപാടിയിൽ അദ്ദേഹം പറഞ്ഞു.
2020 മുതലുള്ള തന്റെ ശരീരഭാരം കുറയ്‌ക്കൽ യാത്രയെക്കുറിച്ചുള്ള അനുഭവം പങ്കുവെച്ചുകൊണ്ട്, വ്യായാമവും ഉറക്കവും ഗൗരവമായി എടുക്കണമെന്ന് ഷാ ആളുകളോട് ആവശ്യപ്പെട്ടു. “ശരീരത്തിനായി രണ്ട് മണിക്കൂർ വ്യായാമവും തലച്ചോറിനായി ആറ് മണിക്കൂർ ഉറക്കവും നീക്കിവയ്‌ക്കാൻ ഞാൻ നിങ്ങളോട് അഭ്യർത്ഥിക്കുന്നു. ഇത് വളരെ ഉപകാരപ്രദമായിരിക്കും. ഇത് എന്റെ സ്വന്തം അനുഭവമാണ്,” അദ്ദേഹം പറഞ്ഞു. ഡൽഹി ലെഫ്റ്റനന്റ് ഗവർണർ വിനയ് സക്‌സേന, മുഖ്യമന്ത്രി രേഖ ഗുപ്ത എന്നിവരുൾപ്പെടെ നിരവധി പ്രമുഖരും കേന്ദ്രമന്ത്രിക്കൊപ്പം പരിപാടിയിൽ പങ്കെടുത്തു.
