ഇടുക്കി: ഉച്ചയൂണിന് കറി കുറഞ്ഞതിനെ ചൊല്ലിയുണ്ടായ സംഘർഷത്തിൽ ഏഴ് പേർക്ക് പരിക്കേറ്റു. കട്ടപ്പനയിലെ ഹോട്ടലിൽ ചൊവ്വാഴ്ച ഉച്ചയ്‌ക്കാണ് സംഭവം. ഭക്ഷണം കഴിക്കാൻ എത്തിയ ആറു പേർക്കും ഹോട്ടൽ ജീവനക്കാരനുമാണ് പരുക്കേറ്റത്.
കല്യാണ വസ്ത്രമെടുക്കാനായി കട്ടപ്പനയിൽ എത്തിയ മ്ലാമല സ്വദേശി ഷംസും കുടുംബവും ഹോട്ടലിൽ ഭക്ഷണം കഴിക്കാൻ എത്തിയിരുന്നു. മേശയിൽ വച്ചിരുന്ന പാത്രങ്ങളിൽ കറി അളവ് കുറവായത് ഇവർ ചോദ്യം ചെയ്തു. തുടർന്ന് ജീവനക്കാരുമായുണ്ടായ തർക്കമാണ് സംഘർഷത്തിൽ കലാശിച്ചത്.
കയ്യാങ്കളിയിൽ പ്രതിശ്രുത വരനും പരിക്കേറ്റു. പിന്നാലെ ഇരുവിഭാഗവും കട്ടപ്പന താലൂക്ക് ആശുപത്രിയിൽ ചികിത്സ തേടി. ആശുപത്രിയിലും ഇവർ ഏറ്റുമുട്ടിയതിനെ തുടർന്ന് കട്ടപ്പന പൊലീസ് എത്തി ഇവരെ വെവ്വേറെ ആശുപത്രികളിലേക്ക് മാറ്റി. സംഭവത്തിൽ പൊലീസ് കേസെടുത്തിട്ടുണ്ട്.
