പത്തനംതിട്ട: ഓടിക്കൊണ്ടിരിക്കുന്ന ബൈക്കിന് തീപിടിച്ച് പൊള്ളലേറ്റ യുവാവ് മരിച്ചു. പത്തനംതിട്ട അങ്ങാടിക്കൽ തെക്ക് സ്വദേശി രാജനാണ് മരിച്ചത്.
കഴിഞ്ഞ തിങ്കളാഴ്ചയാണ് പറക്കോട് ബ്ലോക്ക് ഓഫീസിന് സമീപത്ത് വച്ച് രാജന്റെ ബൈക്കിന് തീപിടിച്ചത്. ബൈക്കിന്റെ അറ്റകുറ്റപ്പണിക്കായി വർക്ക് ഷോപ്പിലേക്ക് പോകുന്നതിനിടെയായിരുന്നു അപകടം.
പെട്രോൾ ടാങ്കിലേക്കു തീപടർന്നതോടെ രാജന് ബൈക്കിൽ നിന്നും ഇറങ്ങാൻ ആയില്ല. ഗുരുതരമായി പൊള്ളലേറ്റ രാജനെ ആദ്യം അടൂർ ജനറൽ ആശുപത്രിയിലും പിന്നിട് കോട്ടയം മെഡിക്കൽ കോളജ് ആശുപത്രിയിലേക്കും മാറ്റിയിരുന്നു.
