പത്തനംതിട്ട: നിയമം തെറ്റിച്ച് ശബരിമലയിലേക്ക് പോലീസ് ഉന്നതൻ ട്രാക്ടർ യാത്ര നടത്തിയെന്ന വിവരത്തിൽ സ്പെഷ്യൽ കമ്മീഷണർ പ്രാഥമിക അന്വേഷണം തുടങ്ങി. പമ്പയിൽ നിന്ന് സന്നിധാനത്തേക്ക് ട്രാക്ടറിൽ ആളെക്കയറ്റാൻ പാടില്ലെന്ന് ഹൈക്കോടതി ഉത്തരവ് നിലനിൽക്കെയാണ് ലംഘനം. ദേവസ്വം വിജിലൻസിനോട് സ്പെഷ്യൽ കമ്മീഷണർ റിപ്പോർട്ട് തേടിയിട്ടുണ്ട്. വീഴ്ചയുണ്ടെയാണ് അന്വേഷണത്തിൽ വ്യക്തമായാൽ ഹൈക്കോടതിക്ക് റിപ്പോർട്ട് നൽകും.
നവഗ്രഹ ക്ഷേത്ര പ്രതിഷ്ഠാ ചടങ്ങുകൾക്കായി കഴിഞ്ഞ ദിവസം നട തുറന്നിരുന്നു. ഇതിനിടയിലാണ് പോലീസ് ഉന്നതൻ ട്രാക്ടറിൽ യാത്ര ചെയ്ത് സന്നിധാനത്തെത്തിയതെന്നാണ് വിവരം. ചരക്ക് നീക്കത്തിന് മാത്രമേ ട്രാക്ടർ ഉപയോഗിക്കാവു എന്നാണ് ഹൈക്കോടതിയുടെ കർശന നിർദേശം. എന്നാൽ പൊലീസിന്റെ തന്നെ ട്രാക്ടറിലാണ് ഉദ്യോഗസ്ഥൻ യാത്രചെയ്തതെന്നാണ് സൂചന.
