തൃശൂർ: ബാറിൽ ടച്ചിങ്സ് കൊടുക്കാത്തതിന്റെ പേരിലുണ്ടായ തർക്കത്തിനെത്തുടർന്ന് ബാർ ജീവനക്കാരനെ പതിയിരുന്ന് കുത്തിക്കൊലപ്പെടുത്തിയായാൽ അറസ്റ്റിൽ. അളകപ്പ നഗർ സ്വദേശി സിജോ ജോൺ(40) ആണ് അറസ്റ്റിലായത്. പുതുക്കാട് മേ ഫെയർ ബാറിലെ ജീവനക്കാരനായ എരുമപ്പെട്ടി സ്വദേശി ഹേമചന്ദ്രൻ എന്ന 54കാരനെയാണ് പ്രതി കുത്തിക്കൊലപ്പെടുത്തിയത്.
കഴിഞ്ഞ ദിവസം ഉച്ചയോടെയാണ് സിജോ ബാറിൽ മദ്യപിക്കാൻ എത്തുന്നത്. തുടർന്ന് കൂടുതൽ ടച്ചിങ്സ് ചോദിച്ചിട്ട് നൽകിയില്ലെന്ന് ആരോപിച്ച് കൗണ്ടർ ജീവനക്കാരനുമായി തർക്കമുണ്ടായി. ബഹളം വെച്ച ഇയാളെ ജീവനക്കാർ ബാറിൽ നിന്നും പുറത്താക്കി. ഈ വൈരാഗ്യത്തിലാണ് രാത്രി ബാറടക്കുന്ന സമയം വരെ കാത്തുനിന്ന് സിജോ, പുറത്തിറങ്ങിയ ഹേമചന്ദ്രനെ കഴുത്തിൽ കുത്തി ഓടിമറഞ്ഞത്.
കഴുത്തിൽ രണ്ട് തവണ കുത്തേറ്റ ഹേമചന്ദ്രനെ ഉടൻതന്നെ തൃശൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. തീവ്രപരിചരണ വിഭാഗത്തിൽ ചികിത്സയിലിരിക്കെ മരണം സംഭവിക്കുകയായിരുന്നു. തുടർന്ന് പോലീസ് നടത്തിയ അന്വേഷണത്തിലാണ് പ്രതിയെ പിടികൂടിയത്.
