ബെംഗളൂരു: പബ്ബിലെ ശൗചാലയത്തിൽ യുവാവിനെ ദുരൂഹസാഹചര്യത്തിൽ മരിച്ച നിലയിൽ കണ്ടെത്തി. ബെംഗളൂരുവിലെ രാജരാജേശ്വരി നഗറിലുള്ള പബ്ബിലാണ് സംഭവം. സ്ത്രീകളുടെ ശുചിമുറിയിലാണ് മൃതദേഹം കിടന്നിരുന്നത്. മാണ്ഡ്യ സ്വദേശി മേഘരാജാണ് മരിച്ചത്.
സുഹൃത്തുക്കളോടൊപ്പം കഴിഞ്ഞ ദിവസം രാത്രിയാണ് മേഘരാജ് പബ്ബിലെത്തിയത്. ഇവിടെ നിന്ന് അമിതമായി മദ്യം കഴിച്ചിരുന്നു. പിന്നീട് ഛർദ്ദിക്കാൻ പോകുന്നുവെന്ന് പറഞ്ഞാണ് യുവാവ് ശൗചാലയത്തിലേക്ക് പോയത്. പിന്നീട് ഏറെ നേരം കാണാത്തതിനെ തുടർന്ന് പബ്ബ് അധികൃതർ നടത്തിയ പരിശോധനയിലാണ് മേഘരാജിനെ മരിച്ച നിലയിൽ കണ്ടെത്തിയത്.
യുവാവിന്റെ ദുരൂഹമരണത്തിൽ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. പബ്ബിലെ സിസിടിവി ദൃശ്യങ്ങൾ പരിശോധിച്ചുവരികയാണ്. അമിതമായി മദ്യപിച്ചതാണോ മരണകാരണമെന്ന സംശയവും നിലനിൽക്കുന്നുണ്ട്. പോസ്റ്റുമോർട്ടം റിപ്പോർട്ട് ലഭിച്ചതിന് ശേഷം മാത്രമേ കൂടുതൽ വിവരങ്ങൾ വ്യക്തമാവുകയുള്ളൂ.
