പാലക്കാട്: രാഹുൽ മാങ്കൂട്ടത്തിലിനെതിരെ പരാതി നൽകിയ അതിജീവിതയെ അപമാനിച്ച സംഭവത്തിൽ അഞ്ച് പേർക്കെതിരെ കേസെടുത്തു. കെപിസിസി ജനറൽ സെക്രട്ടറി സന്ദീപ് വാര്യർ, പത്തനംതിട്ട മഹിളാ കോൺഗ്രസ് ജില്ല ജനറൽ സെക്രട്ടറി രഞ്ജിത പുളിക്കൻ, രാഹുൽ ഈശ്വർ, ദീപ ജോസഫ്, ദീപ് ജോസഫ് എന്നിവർക്കെതിരെയാണ് കേസെടുത്തത്. ഇവർക്കെതിരെ അതിജീവിത പരാതി നൽകിയിരുന്നു.
പരാതിക്കാരിയുടെ വ്യക്തിഗത വിവരങ്ങള് വെളിപ്പെടുത്തുക, സ്ത്രീത്വത്തെ അപമാനിക്കല്, ഭീഷണിപ്പെടുത്തല് അടക്കമുള്ള കുറ്റങ്ങളാണ് ഇവര്ക്കെതിരെ ചുമത്തിയിട്ടുള്ളത്. യുവതിയുടെ പരാതിയിൽ രാഹുൽ ഈശ്വറിനെ പൊലീസ് കസ്റ്റഡിയിലെടുത്തിരുന്നു. തിരുവനന്തപുരത്തുള്ള വീട്ടിലെത്തിയാണ് സൈബർ പൊലീസ് കസ്റ്റഡിയിലെടുത്തത്.
അതിജീവിതയുടെ ചിത്രം സന്ദീപ് വാര്യർ നേരത്തെ സോഷ്യൽമീഡിയയിൽ പോസ്റ്റ് ചെയ്തിരുന്നു. എന്നാൽ വിവാദമാകുമെന്നറിഞ്ഞപ്പോൾ പോസ്റ്റ് വലിക്കുകയായിരുന്നു. എന്നാൽ പോസ്റ്റിൽ നിന്ന് നിരവധി പേർ യുവതിയുടെ ചിത്രം കൈക്കലാക്കി പ്രചരിപ്പിച്ചു.
