പെൺകുട്ടിയുടെ ജീവിതത്തിൽ ഏറ്റവും പ്രധാനപ്പെട്ട ദിവസങ്ങളിലൊന്നാണല്ലോ വിവാഹം. ഈ ദിവസം ഏറ്റവും ഭംഗിയായി ഒരുങ്ങാനായിരിക്കും ഏതൊരു വധുവും ആഗ്രഹിക്കുന്നത്. വിവാഹ സാരി തന്നെയാണ് വധുവിനെ സുന്ദരിയാക്കുന്നതിൽ മുൻപന്തിയിൽ നിൽക്കുന്നത്. കാലത്തിനനുസരിച്ച് വിവാഹ വസ്ത്രങ്ങളുടെ ഡിസൈനിലും മാറ്റങ്ങളുണ്ട്. മുൻപ് പെൺകുട്ടികൾക്ക് കടുത്ത നിറങ്ങളാണ് കൂടുതൽ ഇഷ്ടമെങ്കിൽ ഇന്ന് പേസ്റ്റൽ നിറങ്ങളും തിരഞ്ഞെടുക്കാറുണ്ട്.
കാഞ്ചീപുരം
അന്നും ഇന്നും കാഞ്ചിപുരത്തിന് ആരാധകരേറെയാണ്. വളരെ മനോഹരമായി ഞൊറികൾ എടുക്കാൻ സാധിക്കും എന്നതാണ് ഇതിന്റെ പ്രത്യേകത. അതിനാൽ തന്നെ വധുവിന് കൂടുതൽ ആകാരവടിവ് തോന്നും. ഏത് ശരീര പ്രകൃതിയുള്ളവർക്കും അനുയോജ്യമായിരിക്കും എന്നതാണ് ഇത്തരം സാരികളുടെ പ്രത്യേകത.
പവിത്രപ്പട്ട്
25 വർഷം മുൻപത്തെ സാരി ഫാഷൻ തിരിച്ചുവരുന്ന പ്രവണത കേരളത്തിലുണ്ട്. എൺപതുകളിലേയും 90കളിലേയും പവിത്രപ്പട്ടിന് ഇന്ന് ആവശ്യക്കാരേറുന്നുണ്ട്. സാരിയൂടെ ബോഡിയിലുടനീളം വരകളും ഗോൾഡൻ പൊട്ടുകളും വരുന്ന രീതിയിലുള്ള ഡിസൈനാണിത്. സിഗ്നേച്ചർ ഡിസൈനുകൾ ഇഷ്ടപ്പെടുന്നവർ പവിത്രപ്പട്ട് തിരഞ്ഞെടുക്കാറുണ്ട്.
ബനാറസി സാരികൾ
ബോഡിയിൽ കുറവ് വർക്കുള്ള കടുംനിറങ്ങളുള്ള ബനാറസ് സാരികൾ ഇന്നും വിവാഹ വിപണിയിൽ പ്രധാന സ്ഥാനത്തുണ്ട്. ബനാറസ് സാരികൾ പൊതുവേ സിംപിളായിരിക്കും, ഹെവി വർക്കുള്ള ബ്ലൗസാണ് ഇതിന്റെ കൂടെ സ്റ്റൈൽ ചെയ്യാറുള്ളത്.
നെറ്റ് സാരികൾ
ഉത്തരേന്ത്യൻ സ്റ്റൈൽ ഇഷ്ടപ്പെടുന്നവരാണ് നെറ്റ് സാരികൾ തിരഞ്ഞെടുക്കുന്നത്. നൂലും മുത്തുകളും കൊണ്ടുള്ള ഹാൻഡ് വർക്കാണ് സാരിയുടെ ഹൈലൈറ്റ്. സാരിയുടെ ബോർഡറിലും ഹെവി വർക്കുകൾ ഉണ്ടാകും. ഫുൾസ്ലീവ് ബ്ലൗസാണ് ഇതിന്റെ കൂടെ കൂടുതലായും ഉപയോഗിക്കുന്നത്.
