ന്യൂഡൽഹി : വെനസ്വേലയില്‍ കടന്ന് കയറി പ്രസിഡന്‍റ് നിക്കോളാസ് മഡൂറോയെയും ഭാര്യയെയും ബന്ദിയാക്കി കൊണ്ടുപോയ അമേരിക്കന്‍ നടപടിയെ അപലപിച്ച് ഇന്ത്യ. വെനസ്വേലയ്‌ക്ക് എല്ലാവിധ പിന്തുണയും നല്‍കുന്നതായും വിദേശകാര്യമന്ത്രാലയം അറിയിച്ചു.
വെനിസ്വേലയിലെ സംഭവവികാസങ്ങൾ വളരെയധികം ആശങ്കാജനകമാണെന്നും, സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്നും ഇന്ത്യ ഇന്ന് പറഞ്ഞു.
“വെനിസ്വേലയിലെ ജനങ്ങളുടെ ക്ഷേമത്തിനും സുരക്ഷയ്‌ക്കും ഇന്ത്യ പിന്തുണ വീണ്ടും ഉറപ്പിക്കുന്നു. മേഖലയിലെ സമാധാനവും സ്ഥിരതയും ഉറപ്പാക്കിക്കൊണ്ട്, സംഭാഷണത്തിലൂടെ സമാധാനപരമായ പ്രശ്നങ്ങൾ പരിഹരിക്കാൻ ബന്ധപ്പെട്ട എല്ലാവരോടും ഞങ്ങൾ അഭ്യർത്ഥിക്കുന്നു,” വിദേശകാര്യ മന്ത്രാലയം (എംഇഎ) ഇന്ന് ഒരു പ്രസ്താവനയിൽ പറഞ്ഞു.
“കാരക്കാസിലെ ഇന്ത്യൻ എംബസി ഇന്ത്യൻ സമൂഹത്തിലെ അംഗങ്ങളുമായി ബന്ധപ്പെട്ടിട്ടുണ്ട്, സാധ്യമായ എല്ലാ സഹായവും നൽകുന്നത് തുടരും,” പ്രസ്താവനയിൽ പറയുന്നു.
വിദേശകാര്യമന്ത്രാലയ വക്താവ് രണ്‍ധീര്‍ ജയ്സ്വാളാണ് ഞായറാഴ്ച എക്സില്‍ ഇത് സംബന്ധിച്ച ആശങ്ക പങ്കുവെച്ചത്.
ഈ സംഭവവുമായി ബന്ധപ്പെട്ട് ആശങ്കയുള്ള എല്ലാവരും സമാധാനപരമായ സംഭാഷണങ്ങളിലൂടെ ഇവിടുത്തെ പ്രശ്നങ്ങള്‍ പരിഹരിക്കാന്‍ മുന്നോട്ട് വരണമെന്നും ഇന്ത്യ പറഞ്ഞു.
