കൊൽക്കത്ത: പശ്ചിമ ബംഗാളിൽ എസ്ഐആർ നടപടികൾക്കിടയിൽ ബിഎൽഒ ആത്മഹത്യ ചെയ്ത സംഭവത്തിൽ വഴിത്തിരിവ്. സംഭവവുമായി ബന്ധപ്പെട്ട് തൃണമൂൽ കോൺഗ്രസ് നേതാവ് അറസ്റ്റിലായി. ആത്മഹത്യാ പ്രേരണ കുറ്റമാണ് തൃണമൂൽ നേതാവായ ബുള്ളറ്റ് ഖാനെതിരെ ചുമത്തിയിരിക്കുന്നത്.
മുർഷിദാബാദിൽ ബിഎൽഒയായ ഹമീമുൾ ഇസ്ലാം (47) ശനിയാഴ്ച രാത്രിയാണ് ജീവനൊടുക്കിയത്. ഭഗവാൻഗോള ബ്ലോക്ക് രണ്ടിന് കീഴിലുള്ള അലൈപൂർ ഗ്രാമത്തിലെ താമസക്കാരനാണ് ഇദ്ദേഹം. ഹമീമുൾ ഇസ്ലാമിൽ നിന്നും 20 ലക്ഷം രൂപ ബുള്ളറ്റ് ഖാൻ കടം വാങ്ങിയിരുന്നു. പിന്നീട് പണം തിരിച്ച് ചോദിച്ചപ്പോൾ ബിഎൽഒയെ ഇയാൾ ഭീഷണിപ്പെടുത്തി. ഇതാണ് ആത്മഹത്യയിലേക്ക് നയിച്ചതെന്ന് പൊലീസ് പറഞ്ഞു.
എസ്ഐആറുമായി ബന്ധപ്പെട്ട സമ്മർദ്ദം കൊണ്ടാണ് ബിഎൽഒ ആത്മഹത്യ ചെയ്തതെന്ന് ആരോപിച്ച് തൃണമൂൽ കോൺഗ്രസ് നേരത്തെ കൊൽക്കത്തയിലെ മുഖ്യ തിരഞ്ഞെടുപ്പ് ഓഫീസറുടെ ഓഫീസിന് പുറത്ത് പ്രതിഷേധങ്ങൾ നടത്തിയിരുന്നു.
