കുവൈറ്റ് സിറ്റി: കുവൈറ്റിലേക്കും തിരിച്ചും യാത്ര ചെയ്യുന്ന പ്രവാസികൾക്ക് ഇനി നടപടിക്രമങ്ങൾ എളുപ്പമാക്കുവാന് സർക്കാർ സേവന മൊബൈല് ആപ്പായ സാഹേലില് പുതിയ ഫീച്ചര്. കൈവശമുള്ള പണം, സ്വര്ണ്ണം തുടങ്ങിയവ വെളിപ്പെടുത്തുന്നതിനുള്ള പുതിയ സംവിധാനമാണ് ‘സാഹേൽ’ ആപ്പിൽ പ്രവർത്തനം ആരംഭിച്ചിരിക്കുന്നത്. 3,000 ദിനാറിന് മുകളിൽ തുകയുള്ളവർ നിർബന്ധമായും ഈ സേവനം ഉപയോഗിക്കണമെന്ന് കസ്റ്റംസ് അറിയിച്ചു.
കള്ളപ്പണം വെളുപ്പിക്കൽ തടയുന്നതിനും സുതാര്യത വർദ്ധിപ്പിക്കുന്നതിനുമാണ് ഈ പുതിയ ഇലക്ട്രോണിക് സർവീസ്. യാത്രക്കാർക്ക് അവരുടെ കൈവശമുള്ള പണമോ അതിന് തുല്യമായ വിദേശ കറൻസിയോ ആപ്പിലൂടെ മുൻകൂട്ടി ഡിക്ലയർ ചെയ്യാം. 3,000 കുവൈറ്റ് ദിനാറിൽ കൂടുതൽ കൈവശമുള്ളവർ യാത്രയ്ക്ക് മുൻപ് തന്നെ മൊബൈൽ ഫോൺ വഴി വിവരം അറിയിക്കാനുള്ള സൗകര്യമാണ് കുവൈറ്റ് കസ്റ്റംസ് ഒരുക്കിയിരിക്കുന്നത്.
യാത്രക്കാരുടെ സൗകര്യാർത്ഥം ‘ഡിസ്ക്ലോസിങ് ഫണ്ട്സ്’ എന്ന പുതിയ ഫീച്ചറാണ് സാഹേൽ ആപ്പിൽ ഉൾപ്പെടുത്തിയിരിക്കുന്നത്. 3,000 കുവൈറ്റ് ദിനാറോ അതിന് തുല്യമായ വിദേശ കറൻസികളോ കൈവശമുള്ളവർ യാത്രയ്ക്ക് മുൻപായി ആപ്പ് വഴി വിവരങ്ങൾ സമർപ്പിക്കണം. പണം മാത്രമല്ല, സ്വർണ്ണക്കട്ടികൾ, വിലപിടിപ്പുള്ള ലോഹങ്ങൾ, അല്ലെങ്കിൽ മറ്റ് സാമ്പത്തിക രേഖകൾ എന്നിവയുടെ മൂല്യം 3,000 ദിനാറിൽ കൂടുതലാണെങ്കിലും ഈ ഡിക്ലറേഷൻ നിർബന്ധമാണ്.
ഡിജിറ്റൽ ട്രാൻസ്ഫോർമേഷൻ ലക്ഷ്യമിട്ടുള്ള ഈ നീക്കം വിമാനത്താവളങ്ങളിലെയും തുറമുഖങ്ങളിലെയും നടപടിക്രമങ്ങൾ വേഗത്തിലാക്കും. ആപ്പിലൂടെ വിവരങ്ങൾ നൽകിക്കഴിഞ്ഞാൽ യാത്രക്കാർക്ക് ഒരു ഇലക്ട്രോണിക് നോട്ടീസ് ലഭിക്കും. കസ്റ്റംസ് ഉദ്യോഗസ്ഥർക്ക് ഇത് ഡിജിറ്റലായി തന്നെ പരിശോധിക്കാൻ സാധിക്കും. ഇതുവവഴി വിമാനത്താവളത്തിലെ തിരക്കുകൾ ഒഴിവാക്കാനും സമയം ലാഭിക്കാനും സാധിക്കും. നിയമങ്ങൾ പാലിക്കാത്തവർക്ക് പിഴയും നിയമനടപടികളും നേരിടേണ്ടി വരുമെന്നും അധികൃതർ മുന്നറിയിപ്പ് നൽകിയുണ്ട്.
