കൊച്ചി: ബ്ലാസ്റ്റേഴ്സ് മാനേജ്മെന്റുമായുള്ള പിണക്കത്തെത്തുടർന്ന് മത്സരങ്ങൾ ബഹിഷ്കരിച്ച മഞ്ഞപ്പടയോട് ഗ്രൗണ്ടിലേക്ക് തിരിച്ചെത്താൻ അഭ്യർത്ഥിച്ച് കോച്ച് ആശ്ലീ വെസ്റ്റ്വുഡ്. ഏഷ്യയിലെ തന്നെ ഏറ്റവും വലിയ ഫുട്ബോൾ ആരാധക കൂട്ടായ്മയായ മഞ്ഞപ്പടയുടെ അഭാവം ടീമിനെ ബാധിക്കുന്നുണ്ടെന്നും, ആരാധകരുടെ പിന്തുണ ടീമിന് അത്യന്താപേക്ഷിതമാണെന്നും അദ്ദേഹം പറഞ്ഞു.
ടീം മാനേജ്മെന്റിന്റെ നയങ്ങളോടുള്ള വിയോജിപ്പും ടീമിന്റെ തുടർച്ചയായ മോശം പ്രകടനവുമാണ് ആരാധകരെ കടുത്ത തീരുമാനത്തിലേക്ക് നയിച്ചത്. കഴിഞ്ഞ രണ്ട് ഹോം മത്സരങ്ങളിലും മഞ്ഞപ്പടയുടെ സാന്നിധ്യം ഗാലറിയിൽ ഉണ്ടായിരുന്നില്ല. വരും മത്സരങ്ങളിൽ മികച്ച പ്രകടനവും വിജയവും അദ്ദേഹം ആരാധകർക്ക് വാഗ്ദാനം ചെയ്യുന്നു. ആരാധകർ അഭിമാനിക്കുന്ന രീതിയിലുള്ള കഠിനാധ്വാനം ടീമിന്റെ ഭാഗത്തുനിന്നും ഉണ്ടാകുമെന്ന് അദ്ദേഹം വ്യക്തമാക്കി.
വിഷു ദിനത്തിൽ നോർത്ത് ഈസ്റ്റ് യുണൈറ്റഡിനെതിരെ നടക്കുന്ന പോരാട്ടത്തിൽ വിജയിച്ച് ആരാധകരുടെ പിണക്കം മാറ്റാൻ കഴിയുമെന്ന പ്രതീക്ഷയിലാണ് ബ്ലാസ്റ്റേഴ്സ്. കേരള ബ്ലാസ്റ്റേഴ്സിന്റെ പന്ത്രണ്ടാമനായ മഞ്ഞപ്പടയുടെ തിരിച്ചുവരവിനായി മാനേജ്മെന്റും താരങ്ങളും കാത്തിരിക്കുകയാണ്.
