ന്യൂഡല്ഹി: വനിതാ സംവരണവുമായി ബന്ധപ്പെട്ട ഡീലിമിറ്റേഷന് ബില്ലിന്മേലുള്ള ചര്ച്ചയ്ക്കിടെ ലോക്സഭയില് ഭരണ-പ്രതിപക്ഷ അംഗങ്ങള് തമ്മില് രൂക്ഷമായ വാഗ്വാദം. മുസ്ലിം സ്ത്രീകള്ക്ക് പ്രത്യേക സംവരണം വേണമെന്ന അഖിലേഷ് യാദവിന്റെ ആവശ്യവും അതിന് അമിത് ഷാ നല്കിയ മറുപടിയുമാണ് സഭയെ ചൂടുപിടിപ്പിച്ചത്. വനിതാ സംവരണ ബില്ലില് മുസ്ലിം സ്ത്രീകള്ക്കായി പ്രത്യേക ക്വോട്ട അനുവദിക്കണമെന്ന് അഖിലേഷ് യാദവ് ആവശ്യപ്പെട്ടു.
എന്നാല് അഖിലേഷ് യാദവിന്റെ ആവശ്യങ്ങളെ തള്ളിക്കൊണ്ട് അമിത് ഷാ രംഗത്ത് എത്തി. മതാടിസ്ഥാനത്തിലുള്ള സംവരണം ഭരണഘടനാ വിരുദ്ധമാണെന്നും അത് അംഗീകരിക്കാനാവില്ലെന്നും ഷാ വ്യക്തമാക്കി. മുസ്ലിം സ്ത്രീകള്ക്ക് സീറ്റ് നല്കാന് അഖിലേഷിന് ഇത്ര താല്പര്യമുണ്ടെങ്കില് സമാജ്വാദി പാര്ട്ടിയുടെ മുഴുവന് ടിക്കറ്റുകളും അവര്ക്ക് നല്കിക്കൂടേ എന്ന് ഷാ പരിഹസിച്ചു. ‘എസ്പിക്ക് വേണമെങ്കില് എല്ലാ സീറ്റിലും മുസ്ലിം സ്ത്രീകളെ മത്സരിപ്പിക്കാം, ഞങ്ങള്ക്ക് അതില് എതിര്പ്പില്ല,’ അദ്ദേഹം പറഞ്ഞു.
രാജ്യത്ത് സെന്സസ് നടപടികള് ആരംഭിച്ചതായും ഇത്തവണത്തെ സെന്സസില് ജാതി രേഖപ്പെടുത്താനുള്ള കോളം ഉള്പ്പെടുത്തുമെന്നും അമിത് ഷാ സഭയെ അറിയിച്ചു. വീടുകള് തോറുമുള്ള വിവരശേഖരണം ഇപ്പോള് നടന്നു വരികയാണെന്നും അദ്ദേഹം കൂട്ടിച്ചേര്ത്തു. വനിതാ സംവരണത്തിനുള്ള മൂന്ന് സുപ്രധാന ബില്ലുകളാണ് വരും ദിവസങ്ങളില് പാര്ലമെന്റ് ചര്ച്ച ചെയ്യാനിരിക്കുന്നത്.
