ന്യൂഡല്ഹി: സ്വന്തമായി നിലനില്പ്പില്ലാത്ത കോണ്ഗ്രസ് പ്രാദേശിക പാര്ട്ടികളെ ആശ്രയിച്ചു കഴിയുന്ന ‘പരാദ സസ്യമായി’ മാറിയെന്ന് പ്രധാനമന്ത്രി നരേന്ദ്ര മോദി പരിഹസിച്ചു. വനിതാ സംവരണ ബില്ലിനെ എതിര്ക്കാന് പ്രാദേശിക കക്ഷികളെ പ്രേരിപ്പിച്ചതിന് പിന്നില് കോണ്ഗ്രസിന്റെ രാഷ്ട്രീയ ഗൂഢാലോചനയാണെന്നും അദ്ദേഹം ആരോപിച്ചു. രാജ്യത്തെ സ്ത്രീശക്തിയെ തകര്ക്കാനാണ് ഈ നീക്കത്തിലൂടെ കോണ്ഗ്രസ് ശ്രമിച്ചതെന്ന് പ്രധാനമന്ത്രി കുറ്റപ്പെടുത്തി.
പതിറ്റാണ്ടുകളായി തങ്ങള് വരുത്തിയ തെറ്റുകള് തിരുത്താന് ലഭിച്ച ചരിത്രപരമായ അവസരമാണ് വനിതാ സംവരണ ബില്ലിലൂടെ കോണ്ഗ്രസ് നഷ്ടപ്പെടുത്തിയത്. സ്ത്രീകളുടെ അവകാശങ്ങള്ക്കായി നിലകൊള്ളുന്നതിന് പകരം അധികാരം പിടിക്കാനുള്ള ചതിപ്രയോഗങ്ങളാണ് അവര് നടത്തുന്നത്. പ്രാദേശിക പാര്ട്ടികള് ശക്തരാകുന്നത് കോണ്ഗ്രസ് ആഗ്രഹിക്കുന്നില്ല. അവരെ മുന്നിര്ത്തി ഭരണഘടനാ ഭേദഗതിയെ എതിര്പ്പിക്കുന്നത് ആ പാര്ട്ടികളുടെ രാഷ്ട്രീയ ഭാവി തകര്ക്കാനാണ്. കോണ്ഗ്രസ് ഒരുക്കുന്ന ഈ കെണി തിരിച്ചറിയാന് പ്രാദേശിക കക്ഷികള് തയ്യാറാകണം.
രാജ്യത്തിന്റെ ഭൂരിഭാഗം മേഖലകളിലും അപ്രസക്തമായ കോണ്ഗ്രസ്, മറ്റുള്ളവരുടെ ചുമലിലേറി രാഷ്ട്രീയ ലാഭം കൊയ്യാനാണ് ശ്രമിക്കുന്നത്. ഭാരതത്തിന്റെ പെണ്കരുത്തിനെ തളര്ത്താനുള്ള ഈ നീക്കം വിജയിക്കില്ല. വനിതാ സംവരണ ബില് പരാജയപ്പെട്ടതിനെത്തുടര്ന്ന് രാജ്യവ്യാപകമായി കോണ്ഗ്രസിനും പ്രതിപക്ഷ സഖ്യത്തിനുമെതിരെ പ്രതിഷേധം ഇരമ്പുകയാണ്. ബിജെപി പ്രവര്ത്തകരും വിവിധ വനിതാ സംഘടനകളും തെരുവിലിറങ്ങി. ‘സ്ത്രീകളുടെ അവകാശങ്ങള് തുരങ്കം വെച്ചവര്ക്ക് വരാനിരിക്കുന്ന തിരഞ്ഞെടുപ്പുകളില് ബാലറ്റിലൂടെ ഭാരതത്തിലെ പെണ്കരുത്ത് മറുപടി നല്കും.
സ്ത്രീവിരുദ്ധമായ ഈ രാഷ്ട്രീയ ഗൂഢാലോചന രാജ്യം മാപ്പുനല്കില്ല.’ – നരേന്ദ്ര മോദി. സ്ത്രീശാക്തീകരണത്തിന് തടസ്സം നില്ക്കുന്ന ശക്തികളെ ജനങ്ങള് തിരിച്ചറിയുമെന്നും വികസന കുതിപ്പില് സ്ത്രീകളെ മുന്നിരയിലെത്തിക്കാനുള്ള തന്റെ ദൗത്യം തുടരുമെന്നും പ്രധാനമന്ത്രി ആവര്ത്തിച്ചു. പരാജയപ്പെട്ട ബില്ലിനെച്ചൊല്ലി രാഷ്ട്രീയ പോര് പുതിയ തലത്തിലേക്ക് നീങ്ങുകയാണ്.
