ന്യൂഡല്ഹി: ഡല്ഹി വിമാനത്താവളത്തില് നിന്ന് സൂറിച്ചിലേക്ക് പുറപ്പെടേണ്ട സ്വിസ് ഇന്റര്നാഷണല് എയര്ലൈന്സ് വിമാനം പറന്നുയരുന്നതിനിടെ സാങ്കേതിക തകരാര് കണ്ടെത്തിയതിനെത്തുടര്ന്ന് അടിയന്തരമായി യാത്രക്കാരെ ഒഴിപ്പിച്ചു. ഒഴിപ്പിക്കല് നടപടിക്കിടെ ആറ് യാത്രക്കാര്ക്ക് പരിക്കേറ്റു. ഇവരുടെ പരിക്ക് ഗുരുതരമല്ലെന്ന് അധികൃതര് അറിയിച്ചു.
ഞായറാഴ്ച പുലര്ച്ചെയായിരുന്നു സംഭവം. സ്വിസ് ഇന്റര്നാഷണല് എയര്ലൈന്സിന്റെ LX147 വിമാനം റണ്വേയിലൂടെ വേഗത കൈവരിക്കുന്നതിനിടെയാണ് ഒരു എഞ്ചിനില് തകരാര് ശ്രദ്ധയില്പ്പെട്ടത്. വലിയ അപകടം ഒഴിവാക്കാനായി പൈലറ്റുമാര് ഉടന് തന്നെ വിമാനം റണ്വേയില് നിര്ത്തി. വിമാനത്തില് നിന്ന് പുക ഉയരുന്നത് കണ്ട യാത്രക്കാര്ക്കിടയില് നിമിഷനേരം പരിഭ്രാന്തി പടര്ന്നെങ്കിലും സുരക്ഷാ പ്രോട്ടോക്കോളുകള് വേഗത്തില് നടപ്പിലാക്കി.
സംഭവത്തെത്തുടര്ന്ന് ഡല്ഹി വിമാനത്താവളത്തില് പുലര്ച്ചെ തന്നെ ‘ഫുള് എമര്ജന്സി’ പ്രഖ്യാപിച്ചു. വിമാനത്താവളം പുറപ്പെടുവിച്ച യാത്രാ ഉപദേശം അനുസരിച്ച്, എല്ലാ സുരക്ഷാ മാനദണ്ഡങ്ങളും ഉടനടി പാലിക്കുകയും യാത്രക്കാരെ സുരക്ഷിതമായി പുറത്തെത്തിക്കുകയും ചെയ്തു. റണ്വേ 28/10ല് നടന്ന ഈ സംഭവം വിമാനത്താവളത്തിന്റെ മറ്റ് പ്രവര്ത്തനങ്ങളെ ബാധിച്ചിട്ടില്ലെന്നും അധികൃതര് വ്യക്തമാക്കി.
4 കുട്ടികള് ഉള്പ്പെടെ 228 യാത്രക്കാരാണ് വിമാനത്തില് ഉണ്ടായിരുന്നത്. എമര്ജന്സി സ്ലൈഡുകളും കോണികളും ഉപയോഗിച്ചാണ് യാത്രക്കാരെയും ജീവനക്കാരെയും പുറത്തെത്തിച്ചത്. സാങ്കേതിക വിദഗ്ധര് വിമാനം വിശദമായ പരിശോധനയ്ക്ക് വിധേയമാക്കും. യാത്രക്കാര്ക്ക് ബദല് വിമാന സൗകര്യങ്ങളും താമസസൗകര്യവും ഏര്പ്പെടുത്താനുള്ള ശ്രമങ്ങള് എയര്ലൈന് അധികൃതര് ആരംഭിച്ചിട്ടുണ്ട്.
