ബിഷ്കെക്ക്: ഭീകരവാദത്തിന് താവളമൊരുക്കുന്ന രാജ്യങ്ങള് അതിന്റെ പ്രത്യാഘാതങ്ങളില് നിന്ന് മുക്തി പ്രതീക്ഷിക്കേണ്ടതില്ലെന്ന് കേന്ദ്ര പ്രതിരോധ മന്ത്രി രാജ്നാഥ് സിംഗ്. കിര്ഗിസ്ഥാന് തലസ്ഥാനമായ ബിഷ്കെക്കില് നടന്ന ഷാങ്ഹായ് സഹകരണ സംഘടന പ്രതിരോധ മന്ത്രിമാരുടെ യോഗത്തില് സംസാരിക്കുകയായിരുന്നു അദ്ദേഹം. ഭീകരവാദത്തോടുള്ള ഇന്ത്യയുടെ വിട്ടുവീഴ്ചയില്ലാത്ത നിലപാട് അദ്ദേഹം ആവര്ത്തിച്ചു.
ഏപ്രില് 22-ന് പഹല്ഗാമിലുണ്ടായ ഭീകരാക്രമണം മനുഷ്യരാശിയെ ഒന്നടങ്കം നടുക്കിയ ഒന്നാണെന്ന് രാജ്നാഥ് സിംഗ് ചൂണ്ടിക്കാട്ടി. ഇത്തരം വെല്ലുവിളികളെ നേരിടാനുള്ള ഇന്ത്യയുടെ ദൃഢനിശ്ചയം അദ്ദേഹം വ്യക്തമാക്കി. ‘ഓപ്പറേഷന് സിന്ദൂരിലൂടെ ഭീകരവാദത്തിന്റെ പ്രഭവകേന്ദ്രങ്ങള് ശിക്ഷാനടപടികളില് നിന്ന് മുക്തമല്ലെന്ന് നമ്മള് തെളിയിച്ചതാണ്,’ അദ്ദേഹം പറഞ്ഞു. പാകിസ്ഥാന്റെ പേര് നേരിട്ട് പരാമര്ശിച്ചില്ലെങ്കിലും അയല്രാജ്യത്തിനുള്ള വ്യക്തമായ മുന്നറിയിപ്പായാണ് ഈ വാക്കുകള് വിലയിരുത്തപ്പെടുന്നത്.
ഭീകരവാദം, വിഘടനവാദം, തീവ്രവാദം എന്നിവയ്ക്കെതിരെ വിട്ടുവീഴ്ചയില്ലാത്ത സമീപനം സ്വീകരിക്കണമെന്ന് അദ്ദേഹം ആവശ്യപ്പെട്ടു. ഭീകരവാദത്തെ തുരത്തുന്നതിലൂടെ മാത്രമേ പ്രാദേശിക സുരക്ഷ ഉറപ്പാക്കാന് കഴിയൂ എന്നും അദ്ദേഹം കൂട്ടിച്ചേര്ത്തു. ലോകം ഇപ്പോള് അഭൂതപൂര്വമായ പ്രതിസന്ധികളെയാണ് നേരിടുന്നതെന്ന് പ്രതിരോധ മന്ത്രി പറഞ്ഞു. രാജ്യാന്തര നിയമങ്ങള് കാറ്റില് പറത്തുന്ന പ്രവണത വര്ദ്ധിച്ചു വരികയാണെന്നും ഇത് ഗൗരവകരമാണെന്നും അദ്ദേഹം മുന്നറിയിപ്പ് നല്കി. ‘വ്യത്യാസങ്ങള് തര്ക്കങ്ങളായി മാറാത്ത, തര്ക്കങ്ങള് ദുരന്തങ്ങളിലേക്ക് നയിക്കാത്ത ഒരു ലോകമാണ് നമുക്ക് ആവശ്യം,’ അദ്ദേഹം പറഞ്ഞു.
ഭീകരവാദത്തിനെതിരെ കര്ശന നിലപാട് വ്യക്തമാക്കുമ്പോഴും, സമാധാനത്തിന് ചര്ച്ചകളും നയതന്ത്രവുമാണ് വേണ്ടതെന്ന് അദ്ദേഹം ഓര്മ്മിപ്പിച്ചു. നിരന്തരമായ ബലപ്രയോഗത്തിന് പകരം സമാധാനപരമായ സഹവര്ത്തിത്വത്തിനാണ് പ്രാധാന്യം നല്കേണ്ടത്. എസ്.സി.ഒ അംഗരാജ്യങ്ങള് ആഗോള ജനസംഖ്യയുടെ വലിയൊരു ഭാഗത്തെ പ്രതിനിധീകരിക്കുന്നതിനാല്, പ്രാദേശികവും ആഗോളവുമായ സ്ഥിരത ഉറപ്പാക്കാന് ഈ രാജ്യങ്ങള്ക്ക് വലിയ ഉത്തരവാദിത്തമുണ്ടെന്നും അദ്ദേഹം പറഞ്ഞു.
നയതന്ത്ര പാതയിലൂടെയും വ്യക്തമായ ലക്ഷ്യബോധത്തോടെയും അംഗരാജ്യങ്ങള് ഒരുമിച്ച് പ്രവര്ത്തിക്കണമെന്ന ആഹ്വാനത്തോടെയാണ് അദ്ദേഹം പ്രസംഗം അവസാനിപ്പിച്ചത്. ഭീകര ശൃംഖലകളെ പിന്തുണയ്ക്കുന്നവര്ക്കെതിരെ അന്താരാഷ്ട്ര തലത്തില് ഉത്തരവാദിത്തം ഉറപ്പാക്കണമെന്ന ഇന്ത്യയുടെ ആവശ്യം അദ്ദേഹം യോഗത്തില് ശക്തമായി ഉന്നയിച്ചു.
