വാരണാസി: സ്വന്തം ലോക്സഭാ മണ്ഡലമായ വാരണാസിയില് ആറായിരം കോടിയിലധികം രൂപയുടെ വികസന പദ്ധതികള്ക്ക് തുടക്കം കുറിച്ച് പ്രധാനമന്ത്രി നരേന്ദ്ര മോദി. ചൊവ്വാഴ്ച വൈകുന്നേരം വാരണാസിയിലെത്തിയ അദ്ദേഹം, 1,050 കോടി രൂപയുടെ 48 പൂര്ത്തിയാക്കിയ പദ്ധതികള് നാടിന് സമര്പ്പിക്കുകയും 5,300 കോടി രൂപയുടെ 112 പുതിയ പദ്ധതികള്ക്ക് തറക്കല്ലിടുകയും ചെയ്തു. രണ്ട് ദിവസത്തെ ഉത്തര്പ്രദേശ് സന്ദര്ശനത്തിനായാണ് പ്രധാനമന്ത്രി എത്തിയത്.
വാരണാസി-അസംഗഡ് റോഡ് വീതികൂട്ടല് പദ്ധതി പൂര്ത്തിയായി. കസാക്പുര, കദിപൂര് എന്നിവിടങ്ങളിലെ നിര്ണ്ണായകമായ റെയില്വേ ഓവര് ബ്രിഡ്ജുകള് ഗതാഗതത്തിനായി തുറന്നുകൊടുത്തു. ഭഗവാന്പൂരില് പ്രതിദിനം 55 ദശലക്ഷം ലിറ്റര് ശേഷിയുള്ള മലിനജല സംസ്കരണ പ്ലാന്റ് പ്രവര്ത്തനം ആരംഭിച്ചു. നഗരത്തിന്റെ അടിസ്ഥാന സൗകര്യങ്ങള് മെച്ചപ്പെടുത്തുന്നതിനായുള്ള അമൃത് 2.0 (പദ്ധതിക്ക് കീഴിലുള്ള 13 കുടിവെള്ള-മലിനജല പദ്ധതികള് ഇതില് ഉള്പ്പെടുന്നു.
ശ്രീ ശിവപ്രസാദ് ഗുപ്ത ഡിവിഷണല് ജില്ലാ ആശുപത്രിയില് 500 കിടക്കകളുള്ള മള്ട്ടി സൂപ്പര് സ്പെഷ്യാലിറ്റി ബ്ലോക്ക്, 100 കിടക്കകളുള്ള ക്രിട്ടിക്കല് കെയര് ബ്ലോക്ക്. വാരണാസി ജംഗ്ഷന് – പണ്ഡിറ്റ് ദീന് ദയാല് ഉപാധ്യായ ജംഗ്ഷന് റെയില്വേ ലൈന് വിപുലീകരണം, ഗംഗാ നദിക്ക് കുറുകെ പുതിയ റെയില്-റോഡ് പാലം. അസി ഘട്ട്, ദശാശ്വമേധ ഘട്ട്, നമോ ഘട്ട് എന്നിവിടങ്ങളിലെ സൗകര്യങ്ങള് നവീകരിക്കും.പഇന്റഗ്രേറ്റഡ് ഡിവിഷണല് ഓഫീസ്, നഗര് നിഗം കെട്ടിടം, രാംനഗറില് ചൈല്ഡ് ഷെല്ട്ടര് ഹോം എന്നിവ നിര്മ്മിക്കും എന്നിവയാണ് മറ്റ് പ്രധാന പദ്ധതികള്.
വികസന പദ്ധതികള്ക്ക് പുറമെ, ബനാസ് ഡയറിയുമായി സഹകരിക്കുന്ന ഉത്തര്പ്രദേശിലെ ക്ഷീരകര്ഷകര്ക്കായി 105 കോടിയിലധികം രൂപ ബോണസായി പ്രധാനമന്ത്രി കൈമാറി. വാരണാസിയുടെ മുഖച്ഛായ മാറ്റുന്ന ഈ പദ്ധതികള് വരും വര്ഷങ്ങളില് നഗരത്തിന്റെ സാമ്പത്തിക-സാംസ്കാരിക മേഖലകളില് വലിയ മുന്നേറ്റമുണ്ടാക്കുമെന്ന് പ്രധാനമന്ത്രി പ്രത്യാശ പ്രകടിപ്പിച്ചു.
