അഹമ്മദാബാദ്: സോഷ്യല് മീഡിയയിലെ വ്യാജ ജ്യോതിഷ പ്രൊഫൈല് വഴി യുവതിയെ കെണിയില് വീഴ്ത്തി നഗ്നവീഡിയോ കോള് ചെയ്യിപ്പിക്കുകയും പിന്നീട് ബ്ലാക്ക് മെയില് ചെയ്ത് പണം തട്ടിയെടുക്കുകയും ചെയ്ത സൈബര് തട്ടിപ്പ് പുറത്ത്. താന് ഒരു ട്രാന്സ്ജെന്ഡര് ആത്മീയ ചികിത്സകയാണെന്ന് വിശ്വസിപ്പിച്ചാണ് പ്രതി യുവതിയുടെ വിശ്വാസം പിടിച്ചുപറ്റിയത്.
സ്വകാര്യ ജീവിതത്തിലെ ചില പ്രശ്നങ്ങള്ക്ക് പരിഹാരം തേടിയാണ് യുവതി ഇന്സ്റ്റാഗ്രാമിലെ ‘
‘Astrologer Pooja Kinnar Maa’ എന്ന അക്കൗണ്ടിനെ സമീപിച്ചത്. യുവതിയുടെ പ്രശ്നങ്ങള് പരിഹരിക്കാന് പ്രത്യേക പൂജകള് നടത്താമെന്ന് പ്രതി വാഗ്ദാനം ചെയ്തു. ഇതിന്റെ ഭാഗമായി യുവതിയുടെ ഫോട്ടോകള് അയച്ചുനല്കാന് പ്രതി ആവശ്യപ്പെടുകയായിരുന്നു.
യുവതി നല്കിയ ചിത്രങ്ങള് മോര്ഫ് ചെയ്ത പ്രതി, അവ സമൂഹമാധ്യമങ്ങളില് പ്രചരിപ്പിക്കുമെന്ന് ഭീഷണിപ്പെടുത്തി പണം തട്ടാന് ശ്രമിച്ചു. പൂജ പൂര്ത്തിയാക്കാന് നഗ്നവീഡിയോ കോള് ആവശ്യമാണെന്ന് പറഞ്ഞ് യുവതിയെ പ്രതി നിര്ബന്ധിച്ചു. തുടര്ന്ന് ഈ വീഡിയോ കോള് റെക്കോര്ഡ് ചെയ്ത് സൂക്ഷിക്കുകയും അത് പുറത്തുവിടുമെന്ന് ഭീഷണിപ്പെടുത്തി പണം ആവശ്യപ്പെടുകയുമായിരുന്നു.
ലക്ഷക്കണക്കിന് രൂപ നഷ്ടമായതോടെയാണ് യുവതി പോലീസില് പരാതിപ്പെട്ടത്. സംഭവത്തില് അന്വേഷണം ആരംഭിച്ച സൈബര് പോലീസ് ഇത്തരം വ്യാജ പ്രൊഫൈലുകളെക്കുറിച്ച് ജാഗ്രത പാലിക്കണമെന്ന് പൊതുജനങ്ങള്ക്ക് മുന്നറിയിപ്പ് നല്കി.
