അമരാവതി: ഇന്ത്യയുടെ പ്രതിരോധ മേഖലയില്‍ വിപ്ലവകരമായ മാറ്റം ലക്ഷ്യമിടുന്ന ‘അഡ്വാന്‍സ്ഡ് മീഡിയം കോംബാറ്റ് എയര്‍ക്രാഫ്റ്റ്’ പദ്ധതിയുടെ നിര്‍മ്മാണ പ്രവര്‍ത്തനങ്ങള്‍ക്ക് തുടക്കമായി. ആന്ധ്രാപ്രദേശിലെ ശ്രീ സത്യസായി ജില്ലയിലെ പുട്ടപര്‍ത്തിയില്‍ നടന്ന ചടങ്ങില്‍ കേന്ദ്ര പ്രതിരോധ മന്ത്രി രാജ്നാഥ് സിംഗും മുഖ്യമന്ത്രി എന്‍. ചന്ദ്രബാബു നായിഡുവും ചേര്‍ന്നാണ് തറക്കല്ലിട്ടത്. ഏകദേശം 15,803 കോടി രൂപയാണ് ഈ ബൃഹദ് പദ്ധതിയുടെ ചെലവ് പ്രതീക്ഷിക്കുന്നത്.
ഭാരതത്തിന്റെ സ്വന്തം അത്യാധുനിക സ്റ്റെല്‍ത്ത് യുദ്ധവിമാനങ്ങള്‍ നിര്‍മ്മിക്കുന്നതിനുള്ള നിര്‍ണ്ണായക ചുവടുവെപ്പാണിത്. വ്യോമസേനയുടെ കരുത്ത് വര്‍ദ്ധിപ്പിക്കുക എന്ന ലക്ഷ്യത്തോടെ ആരംഭിച്ച ഈ പദ്ധതിയോടൊപ്പം ഡ്രോണ്‍ നിര്‍മ്മാണം ഉള്‍പ്പെടെയുള്ള മറ്റ് പ്രതിരോധ അനുബന്ധ പദ്ധതികള്‍ക്കും തുടക്കം കുറിച്ചിട്ടുണ്ട്. മന്ത്രി നാര ലോകേഷും ചടങ്ങില്‍ പങ്കെടുത്തു.
പ്രതിരോധ നിര്‍മ്മാണ മേഖലയില്‍ വലിയൊരു കുതിച്ചുചാട്ടമാണ് ഈ പദ്ധതിയോടെ ആന്ധ്രാപ്രദേശ് പ്രതീക്ഷിക്കുന്നത്. നേരിട്ടും അല്ലാതെയും ഏകദേശം 7,500 തൊഴിലവസരങ്ങള്‍ ഈ മേഖലയില്‍ സൃഷ്ടിക്കപ്പെടുമെന്ന് ഔദ്യോഗിക പത്രക്കുറിപ്പ് വ്യക്തമാക്കുന്നു. ഇതോടെ പ്രതിരോധ ഉല്‍പ്പാദന രംഗത്തെ പ്രധാന ഹബ്ബായി പുട്ടപര്‍ത്തി മാറും.
ഉദ്ഘാടനത്തിന് ശേഷം നേതാക്കള്‍ മിസൈലുകള്‍, ഗ്രനേഡുകള്‍, അത്യാധുനിക തോക്കുകള്‍, യുദ്ധവിമാനങ്ങളുടെ മാതൃകകള്‍ എന്നിവ പ്രദര്‍ശിപ്പിച്ച പ്രതിരോധ പ്രദര്‍ശനം സന്ദര്‍ശിച്ചു. ഇന്ത്യയുടെ വര്‍ദ്ധിച്ചുവരുന്ന സൈനിക ശക്തിയുടെയും തദ്ദേശീയ സാങ്കേതിക വിദ്യയുടെയും നേര്‍ക്കാഴ്ചയായിരുന്നു ഈ പ്രദര്‍ശനം.
പ്രതിരോധ മേഖലയില്‍ ഇറക്കുമതി കുറയ്‌ക്കാനും സ്വയംപര്യാപ്തത കൈവരിക്കാനുമുള്ള ‘ആത്മനിര്‍ഭര്‍ ഭാരത്’ കാഴ്ചപ്പാടിന് ഈ പദ്ധതി വലിയ കരുത്ത് പകരുമെന്ന് വിദഗ്ധര്‍ വിലയിരുത്തുന്നു. അടുത്ത തലമുറയിലെ യുദ്ധവിമാനങ്ങള്‍ ഇന്ത്യയില്‍ തന്നെ നിര്‍മ്മിക്കുന്നതോടെ ആഗോള പ്രതിരോധ വിപണിയില്‍ രാജ്യത്തിന്റെ സ്ഥാനം കൂടുതല്‍ ശക്തമാകും.
