മലപ്പുറം: വിദേശയിനത്തില്പ്പെട്ട വിഷപ്പാമ്പിന്റെ കടിയേറ്റ് തീവ്രപരിചരണ വിഭാഗത്തില് ചികിത്സയിലായിരുന്ന ഒന്നാം ക്ലാസ് വിദ്യാര്ത്ഥിക്ക് ദാരുണാന്ത്യം. മങ്കട മേലെ അരിപ്ര പാലക്കല് നൗഫലിന്റെ മകന് നസല് (7) ആണ് കോഴിക്കോട് മെഡിക്കല് കോളേജ് ആശുപത്രിയില് വെച്ച് മരണത്തിന് കീഴടങ്ങിയത്. അരിപ്ര മേല്മുറി സ്കൂളിലെ വിദ്യാര്ത്ഥിയാണ്.
ദിവസങ്ങള്ക്ക് മുന്പാണ് നസലിന് പാമ്പ് കടിയേല്ക്കുന്നത്. കൊണ്ടോട്ടി കിഴിശ്ശേരിയിലുള്ള അമ്മയുടെ കുടുംബവീട്ടില് വെച്ചായിരുന്നു സംഭവം. കുടുംബത്തോടൊപ്പം വിനോദയാത്ര പോകാനായി പുലര്ച്ചെ തയ്യാറെടുക്കുന്നതിനിടെ വീടിന് പുറത്തിറങ്ങിയ കുട്ടിയെ പാമ്പ് കടിക്കുകയായിരുന്നു. ഉടന് തന്നെ കോഴിക്കോട് മെഡിക്കല് കോളേജില് എത്തിച്ചെങ്കിലും ആരോഗ്യനില വഷളായതിനെ തുടര്ന്ന് കഴിഞ്ഞ കുറച്ചു ദിവസങ്ങളായി വെന്റിലേറ്ററിന്റെ സഹായത്തോടെയാണ് ജീവന് നിലനിര്ത്തിയിരുന്നത്.
ശ്രീലങ്കന് വിഭാഗത്തിലുള്ള പ്രത്യേകയിനം വിഷപ്പാമ്പാണ് കുട്ടിയെ കടിച്ചതെന്ന് മെഡിക്കല് സംഘം പരിശോധനയില് സ്ഥിരീകരിച്ചിരുന്നു. ഈ അപൂര്വ്വ ഇനം പാമ്പുകളുടെ വിഷം നിര്വീര്യമാക്കാനുള്ള ആന്റിവെനം (വിഷസംഹാരി) നിലവില് ഇന്ത്യയില് ലഭ്യമല്ലെന്നത് ചികിത്സയെ ഗുരുതരമായി ബാധിച്ചു. മറ്റ് രാജ്യങ്ങളില് നിന്ന് അടിയന്തിരമായി മരുന്ന് എത്തിക്കാനുള്ള ശ്രമങ്ങള് അധികൃതര് ആരംഭിച്ചുവെങ്കിലും, അതിനു മുന്പുതന്നെ കുട്ടി മരണത്തിന് കീഴടങ്ങുകയായിരുന്നു.
