പത്തനംതിട്ട: ശബരിമലയിലെ സ്വർണ്ണം പൊതിഞ്ഞ ശ്രീകോവിലിന്റെ മുകളിൽ നിറവ്യത്യാസം. എന്തോ ദ്രാവകം ഒഴിച്ചെന്നാണ് സംശയം. പിന്നാലെ തിരുവാഭരണ കമ്മീഷണർ അടക്കം സന്നിധാനത്തെത്തി പരിശോധന നടത്തി.
ഇന്ന് രാവിലെയാണ് നിറവ്യത്യാസം ശ്രദ്ധയിൽപ്പെടുന്നത്. അയ്യപ്പസ്വാമിയുടെ ശ്രീകോവിലിന്റെ മേൽക്കൂരയുടെ ഇടത് ഭാഗത്തായാണ് കറുത്ത നിറത്തിലുള്ള പാടുകൾ പ്രത്യക്ഷപ്പെട്ടത്. ജീവനക്കാർ വിവരം അറിയിച്ചതിന്റെ അടിസ്ഥാനത്തിലാണ് തിരുവാഭരണ കമ്മീഷണർ എത്തി പരിശോധന നടത്തിയത്.
ഭക്തർ നെയ്യ് ഒഴിച്ചെന്നാണ് പ്രാഥമിക വിലയിരുത്തൽ. ഈ ഭാഗത്താണ് ഭക്തർ നെയ്യഭിഷേകത്തിന് വരിനിൽക്കുന്നത്. ഇതിനിടെ ആരോ നെയ്യ് മേൽക്കൂരയിലേക്ക് ഒഴിച്ചതാവാം എന്നാണ് നിഗമനം. വരുന്ന മണിക്കൂറുകളിൽ കൂടുതൽ പരിശോധനകൾ നടത്തും എന്നാണ് അറിയിച്ചിരിക്കുന്നത്.
മിഥുനമാസം പൂജകൾക്കായി തിങ്കളാഴ്ചയാണ് നട തുറന്നത്. ശബരിമല, മാളികപ്പുറം ഉപദേവതകളുടെ അഷ്ടബന്ധ കലശം നാളെ അവസാനിക്കും. മിഥുന മാസ പൂജകൾ പൂർത്തിയാക്കി ജൂൺ 19ന് രാത്രി 10 മണിക്ക് ശബരിമല നട അടക്കും.
