അതിര്‍ത്തി കടന്നെത്തിയ മാരകായുധ ശേഖരം പിടിയില്‍; അമൃത്സറില്‍ വന്‍ ഓപ്പറേഷനിലൂടെ ഒരാള്‍ അറസ്റ്റില്‍

ന്യൂഡല്‍ഹി: ഇന്ത്യപാകിസ്ഥാന്‍ അതിര്‍ത്തി വഴി ഡ്രോണ്‍ ഉപയോഗിച്ച് കടത്താന്‍ ശ്രമിച്ച വന്‍ ആയുധശേഖരം സുരക്ഷാസേന പിടികൂടി. പഞ്ചാബിലെ അമൃത്സറിന് സമീപം ബിഎസ്എഫും സംസ്ഥാന പോലീസും ചേര്‍ന്ന് നടത്തിയ സംയുക്ത ഓപ്പറേഷനിലാണ് ഒരാളെ അറസ്റ്റ് ചെയ്യുകയും 26 അത്യാധുനിക തോക്കുകള്‍ ഉള്‍പ്പെടെയുള്ള ആയുധങ്ങള്‍ പിടിച്ചെടുക്കുകയും ചെയ്തത്. അതിര്‍ത്തി കടന്നുള്ള ആയുധക്കടത്ത് ശൃംഖലയെ കുറിച്ചുള്ള നിര്‍ണായക വിവരങ്ങളാണ് അന്വേഷണത്തിലൂടെ പുറത്തുവരുന്നതെന്ന് അധികൃതര്‍ അറിയിച്ചു.

അറസ്റ്റിലായ പ്രതി അമൃത്സര്‍ സ്വദേശിയായ റോഹന്‍ ഖോസ്ലയാണെന്ന് പോലീസ് വ്യക്തമാക്കി. ഓസ്‌ട്രേലിയയില്‍ താമസിക്കുന്ന ഒരാളുടെ നിര്‍ദേശപ്രകാരമാണ് ഇയാള്‍ പ്രവര്‍ത്തിച്ചതെന്നാണ് അന്വേഷണ സംഘത്തിന്റെ പ്രാഥമിക കണ്ടെത്തല്‍. സാമൂഹികമാധ്യമ ആപ്ലിക്കേഷനുകള്‍ വഴിയാണ് ആയുധങ്ങള്‍ ഉപേക്ഷിച്ചിരുന്ന സ്ഥലം ഇയാള്‍ക്ക് കൈമാറിയതെന്നും ഉദ്യോഗസ്ഥര്‍ പറയുന്നു.

അമൃത്സറിലെ ഇന്ത്യ-പാകിസ്ഥാന്‍ അന്താരാഷ്‌ട്ര അതിര്‍ത്തിക്കു സമീപമുള്ള ബോര്‍ഡര്‍ ഔട്ട്പോസ്റ്റ് ഷാഹ്പൂര്‍ മേഖലയിലായിരുന്നു നിര്‍ണായക നീക്കം. ഡ്രോണ്‍ വഴി എത്തിച്ച ആയുധങ്ങള്‍ കൈപ്പറ്റാനെത്തിയെന്ന രഹസ്യവിവരത്തിന്റെ അടിസ്ഥാനത്തില്‍ ബിഎസ്എഫും സ്റ്റേറ്റ് സ്പെഷ്യല്‍ ഓപ്പറേഷന്‍സ് സെല്ലും ചേര്‍ന്ന് നടത്തിയ പരിശോധനയിലാണ് പ്രതി സഞ്ചരിച്ചിരുന്ന ഹ്യുണ്ടായി ഐ20 കാര്‍ തടഞ്ഞത്.

വാഹന പരിശോധനയില്‍ ഒരു എകെ47 റൈഫിളും 25 പിസ്റ്റളുകളും കണ്ടെത്തി. 9 എംഎം, .30 ബോര്‍ വിഭാഗങ്ങളില്‍പ്പെട്ട നൊറിങ്കോ സ്റ്റാര്‍ മാര്‍ക്ക്, ഗ്ലോക്ക്, സിഗാന, ടോറസ്, വാള്‍തര്‍ തുടങ്ങിയ നിര്‍മാതാക്കളുടെ ആയുധങ്ങളാണ് പിടിച്ചെടുത്തതെന്ന് പോലീസ് അറിയിച്ചു. ഇതിനൊപ്പം 368 തത്സമയ വെടിയുണ്ടകളും 48 മാഗസീനുകളും സുരക്ഷാസേനയുടെ കൈവശമായി.

ആയുധങ്ങള്‍ക്കു പുറമെ അമേരിക്കയില്‍ നിര്‍മിച്ച ഒരു ബുള്ളറ്റ് പ്രൂഫ് ജാക്കറ്റും പ്രതി ഉപയോഗിച്ചിരുന്ന കാറും അന്വേഷണസംഘം പിടിച്ചെടുത്തു. ഈ ആയുധങ്ങള്‍ രാജ്യത്തിനകത്തെ മറ്റ് ആളുകള്‍ക്ക് കൈമാറുന്നതിനുള്ള പ്രാദേശിക കണ്ണിയായാണ് പ്രതി പ്രവര്‍ത്തിച്ചതെന്നാണ് അന്വേഷണത്തിന്റെ നിലവിലെ നിഗമനം.

സംഭവത്തില്‍ ആയുധനിയമം, ഭാരതീയ ന്യായ സംഹിത, സിവില്‍ ഏവിയേഷന്‍ നിയമങ്ങളുമായി ബന്ധപ്പെട്ട വകുപ്പുകള്‍ എന്നിവ പ്രകാരം അമൃത്സര്‍ സ്റ്റേറ്റ് സ്പെഷ്യല്‍ ഓപ്പറേഷന്‍സ് സെല്‍ പോലീസ് സ്റ്റേഷനില്‍ കേസ് രജിസ്റ്റര്‍ ചെയ്തിട്ടുണ്ട്.

പഞ്ചാബ് പോലീസ് ഡയറക്ടര്‍ ജനറല്‍ ഗൗരവ് യാദവ്, ഈ നടപടി അതിര്‍ത്തി കടന്നുള്ള ആയുധക്കടത്ത് ശൃംഖലയ്‌ക്കെതിരായ വലിയ വിജയമാണെന്ന് വിലയിരുത്തി. സംഭവത്തിന് പിന്നിലുള്ള മുഴുവന്‍ ശൃംഖലയും കണ്ടെത്തി തകര്‍ക്കുന്നതിനും വിദേശ ബന്ധങ്ങള്‍ ഉള്‍പ്പെടെയുള്ള എല്ലാ കണ്ണികളും പുറത്തുകൊണ്ടുവരുന്നതിനുമായി അന്വേഷണം വിപുലീകരിച്ചിട്ടുണ്ടെന്നും അദ്ദേഹം അറിയിച്ചു.