ജലത്തിനടിയിലും യോഗയുടെ അത്ഭുതം; ഐഎന്‍എസ് സത്വാഹനയില്‍ അണ്ടര്‍വാട്ടര്‍ യോഗാഭ്യാസവുമായി ഇന്ത്യന്‍ നാവികസേന

ന്യൂഡല്‍ഹി: അന്താരാഷ്‌ട്ര യോഗദിനത്തോടനുബന്ധിച്ച് രാജ്യത്തിന്റെ വിവിധ ഭാഗങ്ങളില്‍ വൈവിധ്യമാര്‍ന്ന പരിപാടികള്‍ അരങ്ങേറുന്നതിനിടെ ശ്രദ്ധേയമായി ഇന്ത്യന്‍ നാവികസേനയുടെ പ്രത്യേക യോഗാഭ്യാസം. വിശാഖപട്ടണത്തെ ഐഎന്‍എസ് സത്വാഹനയില്‍ വെള്ളത്തിനടിയില്‍ സംഘടിപ്പിച്ച അണ്ടര്‍വാട്ടര്‍ യോഗ സെഷനിലൂടെയാണ് നാവികസേന വേറിട്ട സന്ദേശം നല്‍കിയത്.

പ്രത്യേക പരിശീലനത്തിന്റെ ഭാഗമായി 40 ഉദ്യോഗസ്ഥരാണ് ജലോപരിതലത്തിനടിയില്‍ വിവിധ യോഗാസനങ്ങള്‍ അഭ്യസിച്ചത്. ഏകാഗ്രത, ശ്വസനനിയന്ത്രണം, മാനസിക സ്ഥിരത, ശാരീരിക സഹിഷ്ണുത എന്നിവ ഉയര്‍ന്ന തലത്തില്‍ നിലനിര്‍ത്താനുള്ള പരിശീലനമായാണ് ഈ പരിപാടി സംഘടിപ്പിച്ചത്.

ലെഫ്റ്റനന്റ് കമാന്‍ഡര്‍ അരുഷ് ശര്‍മ്മയുടെ നേതൃത്വത്തിലും നാവികസേനയിലെ യോഗ വിദഗ്ധരുടെ മേല്‍നോട്ടത്തിലുമാണ് അഭ്യാസം നടന്നത്. ആരോഗ്യസംരക്ഷണത്തിനും ശാരീരികക്ഷമത വര്‍ധിപ്പിക്കുന്നതിനുമൊപ്പം നവീന പരിശീലനരീതികള്‍ സ്വീകരിക്കുന്നതിലുള്ള നാവികസേനയുടെ പ്രതിബദ്ധതയും ഈ സംരംഭം പ്രതിഫലിപ്പിക്കുന്നതായി അധികൃതര്‍ വ്യക്തമാക്കി.

അന്താരാഷ്‌ട്ര യോഗദിനത്തിന്റെ ആഗോള സന്ദേശവുമായി യോജിച്ച് ”ഒരു ഗ്രഹത്തിനായുള്ള യോഗ, ഒരു ആരോഗ്യം” എന്ന ആശയവും പരിപാടിയിലൂടെ ഉയര്‍ത്തിക്കാട്ടി. വെല്ലുവിളി നിറഞ്ഞ സാഹചര്യങ്ങളിലും ശരീരത്തെയും മനസ്സിനെയും ഒരുപോലെ നിയന്ത്രിക്കാന്‍ യോഗയ്‌ക്ക് കഴിയുമെന്ന് ഉദ്യോഗസ്ഥര്‍ പ്രകടമാക്കി.

As a run up to the
International Day of Yoga 2026, INS Satvahana conducted a unique session of Underwater Yoga on 20 Jun 26.

The event had 40 participants from the unit, who demonstrated remarkable breath control, concentration, endurance and composure while performing a series… pic.twitter.com/d6v2IuEri6

— INS Satavahana (@IN_Satavahana) June 20, 2026

”മനസ്സ് ശാന്തം, ശരീരം ശക്തം, സേവനത്തിന് എപ്പോഴും സജ്ജം” എന്ന സന്ദേശത്തോടെയാണ് ഇന്ത്യന്‍ നാവികസേന സമൂഹമാധ്യമമായ എക്‌സില്‍ പരിപാടിയുടെ വിശേഷങ്ങള്‍ പങ്കുവെച്ചത്. ഈ വര്‍ഷത്തെ ”ആരോഗ്യകരമായ വാര്‍ധക്യത്തിനായുള്ള യോഗ” എന്ന പ്രമേയം സ്വീകരിച്ച് കൂടുതല്‍ കരുത്തുറ്റതും ദൗത്യസജ്ജവുമായ സേനയെ വാര്‍ത്തെടുക്കുകയാണ് ലക്ഷ്യമെന്നും നാവികസേന അറിയിച്ചു.

ശാരീരിക പരിശീലനത്തിന് അതീതമായി ശ്വസന നിയന്ത്രണം, അച്ചടക്കം, മാനസിക ജാഗ്രത എന്നിവ മെച്ചപ്പെടുത്തുന്നതില്‍ യോഗ വഹിക്കുന്ന പങ്ക് അണ്ടര്‍വാട്ടര്‍ അഭ്യാസത്തിലൂടെ നേരിട്ട് അനുഭവിക്കാന്‍ ഉദ്യോഗസ്ഥര്‍ക്ക് സാധിച്ചു. പുരാതന യോഗപാരമ്പര്യവും ആധുനിക സൈനിക പരിശീലനവും സമന്വയിപ്പിച്ച ഈ പരീക്ഷണം നാവികസേനയുടെ വ്യത്യസ്തമായ മുന്നേറ്റമായാണ് വിലയിരുത്തപ്പെടുന്നത്.