ഇന്ത്യന് ക്രിക്കറ്റിന്റെ പുതിയ അത്ഭുതതാരമായി വിശേഷിപ്പിക്കപ്പെടുന്ന വൈഭവ് സൂര്യവംശി കരിയറിലെ ഏറ്റവും വിലമതിക്കാനാവാത്ത നിമിഷത്തിന് സാക്ഷിയായി. വെറും 15-ാം വയസില് ഇന്ത്യന് സീനിയര് ടി20 ടീമിലേക്ക് തിരഞ്ഞെടുക്കപ്പെട്ട യുവതാരം ആദ്യമായി ദേശീയ ജഴ്സി ഏറ്റുവാങ്ങിയതിന്റെ ദൃശ്യങ്ങള് പുറത്തുവന്നതോടെ ക്രിക്കറ്റ് ലോകം മുഴുവന് അതേറ്റെടുത്തിരിക്കുകയാണ്.
ഐപിഎല്ലില് നടത്തിയ വിസ്മയിപ്പിക്കുന്ന പ്രകടനമാണ് വൈഭവിന് ദേശീയ ടീമിലേക്കുള്ള വാതില് തുറന്നത്. അയര്ലന്ഡും ഇംഗ്ലണ്ടും ഉള്പ്പെട്ട പര്യടനത്തിനായുള്ള ഇന്ത്യന് ടീമിലേക്ക് സെലക്ഷന് കമ്മിറ്റി അവസരം നല്കിയതോടെ, സീനിയര് ടീമില് ഇടം നേടുന്ന ഏറ്റവും പ്രായം കുറഞ്ഞ താരമെന്ന അപൂര്വ നേട്ടവും വൈഭവ് സ്വന്തമാക്കി.
ബിസിസിഐ സമൂഹമാധ്യമങ്ങളില് പങ്കുവെച്ച വീഡിയോയില് ടീമിന്റെ ത്രോഡൗണ് സ്പെഷ്യലിസ്റ്റ് രഘുവില് നിന്ന് ഇന്ത്യന് ജഴ്സി ഏറ്റുവാങ്ങുന്ന വൈഭവിന്റെ വികാരനിര്ഭരമായ നിമിഷങ്ങളാണ് കാണാന് കഴിയുന്നത്. ജഴ്സി കൈകളിലെത്തിയ നിമിഷം താരത്തിന്റെ മുഖത്ത് നിറഞ്ഞ സന്തോഷവും അഭിമാനവും ആരാധകരുടെ മനസിലും ഇടംപിടിച്ചു.
മൂന്നാം നമ്പര് ജഴ്സിയാണ് വൈഭവിന് ലഭിച്ചിരിക്കുന്നത്. ഇന്ത്യന് ക്രിക്കറ്റില് സുരേഷ് റെയ്നയും ഹര്ഭജന് സിങും ഉള്പ്പെടെയുള്ള പ്രമുഖ താരങ്ങള് ഒരുകാലത്ത് അണിഞ്ഞിരുന്ന ഈ നമ്പര് പുതിയ തലമുറയുടെ പ്രതീക്ഷയായ യുവതാരത്തിന് ലഭിച്ചതും ശ്രദ്ധേയമായി.
Ladies & Gentlemen
The moment the nation has been waiting for has arrived!
Vaibhav Sooryavanshi in #TeamIndia jersey. Witness this incredibly special moment ❤️ pic.twitter.com/sUUytFMPVw
— BCCI (@BCCI) June 23, 2026
ജഴ്സി ഏറ്റുവാങ്ങിയ അനുഭവം പങ്കുവെച്ച വൈഭവ്, ”ക്രിക്കറ്റ് ബാറ്റ് കൈയിലെടുത്ത ആദ്യ ദിവസം മുതല് ഞാന് സ്വപ്നം കണ്ടത് ഈ നിമിഷമായിരുന്നു. ജഴ്സി ഹോട്ടല് മുറിയിലെത്തിയപ്പോള് എങ്ങനെ പ്രതികരിക്കണമെന്ന് പോലും അറിയില്ലായിരുന്നു. ആ നിമിഷം മുതല് എന്റെ മുഖത്തെ ചിരി മാഞ്ഞിട്ടില്ല,” എന്ന് പറഞ്ഞു.
അതേസമയം, അയര്ലന്ഡിനെതിരായ ടി20 പരമ്പരയില് വൈഭവിന് പ്ലെയിംഗ് ഇലവനില് അവസരം ലഭിക്കുമോയെന്ന കാര്യത്തില് ഇതുവരെ വ്യക്തതയില്ല. ഓപ്പണര് സ്ഥാനത്തേക്ക് സഞ്ജു സാംസണ്, അഭിഷേക് ശര്മ്മ, ഇഷാന് കിഷന് എന്നിവരടക്കമുള്ള പരിചയസമ്പന്നരായ താരങ്ങളുമായാണ് യുവതാരത്തിന് മത്സരം.
എന്നിരുന്നാലും, 15-ാം വയസില് തന്നെ ഇന്ത്യന് സീനിയര് ടീമിന്റെ ഡ്രസ്സിംഗ് റൂമിലെത്തിയ വൈഭവ് സൂര്യവംശിയുടെ യാത്ര ഇന്ത്യന് ക്രിക്കറ്റിലെ പുതിയ അധ്യായത്തിന്റെ തുടക്കമായാണ് ആരാധകരും വിദഗ്ധരും വിലയിരുത്തുന്നത്. ഇനി എല്ലാവരുടെയും കണ്ണുകള് കാത്തിരിക്കുന്നത് ഒരു കാര്യം മാത്രം.
