ബാറ്റര്‍മാര്‍ കളി ജയിപ്പിക്കും, പക്ഷേ ടൂര്‍ണമെന്റുകള്‍ ജയിപ്പിക്കുന്നത് പലപ്പോഴും ബൗളര്‍മാരാണ്. ഇന്ത്യയുടെ യുവ സ്പിന്‍ സെന്‍സേഷന്‍ ശ്രീ ചരണി ഇത്തവണ വനിതാ ടി20 ലോകകപ്പില്‍ അതാണ് തെളിയിക്കുന്നത്. ഓരോ മത്സരവും പിന്നിടുമ്പോഴും എതിരാളികളുടെ പ്രതീക്ഷകള്‍ ചുരുട്ടിക്കെട്ടുന്ന ഈ ഇടങ്കയ്യന്‍ സ്പിന്നര്‍, ഇപ്പോള്‍ ഇന്ത്യന്‍ ക്രിക്കറ്റിന്റെ ചരിത്രപുസ്തകത്തിലും സ്വന്തം പേര് സ്വര്‍ണക്ഷരങ്ങളില്‍ കുറിച്ചിരിക്കുകയാണ്.
ബംഗ്ലാദേശിനെതിരായ നിര്‍ണായക പോരാട്ടത്തില്‍ നാല് ഓവറില്‍ വെറും 21 റണ്‍സ് മാത്രം വഴങ്ങി രണ്ട് വിക്കറ്റ് വീഴ്‌ത്തിയ ചരണി, ഒരു ലോകകപ്പിന്റെ ഒറ്റ പതിപ്പില്‍ ഇന്ത്യയ്‌ക്കായി ഏറ്റവും കൂടുതല്‍ വിക്കറ്റ് നേടുന്ന വനിതാ താരമെന്ന റെക്കോര്‍ഡ് സ്വന്തമാക്കി. ഇതോടെ 2020 ലോകകപ്പില്‍ പൂനം യാദവ് സ്ഥാപിച്ച 10 വിക്കറ്റിന്റെ നേട്ടം മറികടന്ന് 12 വിക്കറ്റുമായി പുതിയ ചരിത്രം കുറിക്കാന്‍ 21കാരിക്കായി.
ഷോര്‍ണ അക്തറിന്റെ വിക്കറ്റ് വീണ നിമിഷം തന്നെ റെക്കോര്‍ഡ് ചരണിയുടെ പേരിലായി. പിന്നാലെ നഹിദ അക്തറെയും മടക്കി അയച്ചതോടെ അത് ഒരു റെക്കോര്‍ഡ് മാത്രമല്ല, ഇന്ത്യന്‍ വനിതാ ക്രിക്കറ്റിലെ പുതിയ അധ്യായമായി മാറി. ലോക റാങ്കിങ്ങിലെ ഒന്നാം നമ്പര്‍ ടി20 ബൗളറെന്ന വിശേഷണത്തിന് യോജിച്ച പ്രകടനമാണ് ടൂര്‍ണമെന്റിലുടനീളം താരം പുറത്തെടുക്കുന്നത്.
ബംഗ്ലാദേശിനെ ആദ്യം ബാറ്റ് ചെയ്യിച്ച ഇന്ത്യയ്‌ക്ക് ഫീല്‍ഡിങ്ങില്‍ പിഴവുകള്‍ ആവര്‍ത്തിച്ചെങ്കിലും ബൗളര്‍മാര്‍ അതെല്ലാം മറച്ചു. നാല് ക്യാച്ചുകള്‍ നഷ്ടമായിട്ടും എതിരാളികളെ 136/8 എന്ന സ്‌കോറില്‍ ഒതുക്കാന്‍ ഇന്ത്യന്‍ ബൗളിങ് നിരയ്‌ക്ക് സാധിച്ചു. രാധ യാദവ് മൂന്ന് വിക്കറ്റുമായി മധ്യനിര തകര്‍ത്തപ്പോള്‍ ചരണിയുടെ കൃത്യത ബംഗ്ലാദേശ് ബാറ്റര്‍മാരെ പൂര്‍ണമായും സമ്മര്‍ദത്തിലാക്കി.
137 റണ്‍സ് വിജയലക്ഷ്യം പിന്തുടര്‍ന്ന ഇന്ത്യയ്‌ക്ക് ഷഫാലി വര്‍മയുടെ തീപ്പൊരി അര്‍ധസെഞ്ചുറിയാണ് കരുത്തായത്. വെറും 34 പന്തില്‍ 53 റണ്‍സ് നേടിയ താരം ആക്രമണ ബാറ്റിങ്ങിലൂടെ മത്സരം ഇന്ത്യയുടെ വരുതിയിലാക്കി. ഒടുവില്‍ 16.5 ഓവറില്‍ അഞ്ച് വിക്കറ്റ് നഷ്ടത്തില്‍ ലക്ഷ്യം മറികടന്ന ഇന്ത്യ സെമിഫൈനല്‍ പ്രതീക്ഷകള്‍ നിലനിര്‍ത്തുകയും ചെയ്തു.
എന്നാല്‍ ആ രാത്രിയുടെ യഥാര്‍ത്ഥ നായിക ഷഫാലി മാത്രമായിരുന്നില്ല. ഓരോ ഓവറിലും സമ്മര്‍ദം സൃഷ്ടിച്ച് എതിരാളികളുടെ ശ്വാസംമുട്ടിച്ച ശ്രീ ചരണിയാണ് വീണ്ടും ഇന്ത്യന്‍ ക്യാമ്പിന്റെ കരുത്തായി മാറിയത്. ലോകകപ്പ് വേദിയില്‍ ഒരു പുതിയ സ്പിന്‍ ഇതിഹാസത്തിന്റെ ഉദയമാണോ ഇത് എന്ന ചോദ്യമാണ് ഇപ്പോള്‍ ഇന്ത്യന്‍ ആരാധകരുടെ മനസില്‍ നിറയുന്നത്. 12 വിക്കറ്റുകളുമായി ചരിത്രം തിരുത്തിയ ഈ യുവതാരം, ലോകകപ്പ് സ്വപ്‌നം യാഥാര്‍ഥ്യമാക്കാനുള്ള ഇന്ത്യയുടെ ഏറ്റവും വലിയ ആയുധമായി മാറിക്കഴിഞ്ഞു.
