ന്യൂഡല്ഹി: ഇന്ത്യ-സീഷെല്സ് നയതന്ത്ര ബന്ധത്തിന് പുതിയ കരുത്തേകാന് പ്രധാനമന്ത്രി നരേന്ദ്ര മോദി മൂന്ന് ദിവസത്തെ ഔദ്യോഗിക സന്ദര്ശനത്തിനായി സീഷെല്സിലേക്ക് തിരിച്ചു. സീഷെല്സ് പ്രസിഡന്റ് ഡോ. പാട്രിക് ഹെര്മിനിയുടെ ക്ഷണപ്രകാരമാണ് ജൂണ് 27 മുതല് 29 വരെ നീളുന്ന സന്ദര്ശനം. സീഷെല്സിന്റെ ദേശീയ ദിനത്തിന്റെ സുവര്ണ ജൂബിലി ആഘോഷങ്ങളില് മുഖ്യാതിഥിയായാണ് പ്രധാനമന്ത്രി പങ്കെടുക്കുന്നത്. ഇന്ത്യയും സീഷെല്സും തമ്മിലുള്ള നയതന്ത്ര ബന്ധം സ്ഥാപിതമായതിന്റെ 50-ാം വാര്ഷികം കൂടിയാണ് ഇത്തവണ ആഘോഷിക്കുന്നത്.
സന്ദര്ശനത്തിനിടെ സീഷെല്സ് ദേശീയ അസംബ്ലിയെ അഭിസംബോധന ചെയ്യുന്ന ആദ്യ ഇന്ത്യന് പ്രധാനമന്ത്രി എന്ന ചരിത്ര നേട്ടവും നരേന്ദ്ര മോദി സ്വന്തമാക്കും. കൂടാതെ പ്രസിഡന്റ് പാട്രിക് ഹെര്മിനിയുമായി ഉഭയകക്ഷി ചര്ച്ചകള് നടത്തുകയും ഇന്ത്യന് വംശജരുമായി കൂടിക്കാഴ്ച നടത്തുകയും ചെയ്യും. സമുദ്രസുരക്ഷ, ബ്ലൂ ഇക്കോണമി, കാലാവസ്ഥാ വ്യതിയാനം, പ്രതിരോധ സഹകരണം, സാമ്പത്തിക പങ്കാളിത്തം തുടങ്ങിയ വിഷയങ്ങളാണ് ഉഭയകക്ഷി ചര്ച്ചകളിലെ പ്രധാന അജണ്ട. ഇന്ത്യന് മഹാസമുദ്ര മേഖലയിലെ സുരക്ഷയും വികസനവും ശക്തിപ്പെടുത്തുന്നതിനുള്ള പുതിയ തീരുമാനങ്ങളും ഈ കൂടിക്കാഴ്ചയില് പ്രതീക്ഷിക്കപ്പെടുന്നു.
സീഷെല്സിലെത്തുന്ന പ്രധാനമന്ത്രി ആദ്യം ദേശീയ ബൊട്ടാണിക്കല് ഗാര്ഡന് സന്ദര്ശിച്ച് വൃക്ഷത്തൈ നട്ടുപിടിപ്പിക്കും. തുടര്ന്ന് സീഷെല്സ് കോസ്റ്റ് ഗാര്ഡ് താവളം സന്ദര്ശിക്കും. രാത്രി പ്രസിഡന്റ് പാട്രിക് ഹെര്മിനി ഒരുക്കുന്ന ഔദ്യോഗിക വിരുന്നിലും അദ്ദേഹം പങ്കെടുക്കും. സന്ദര്ശനത്തിലെ ശ്രദ്ധേയ നിമിഷങ്ങളിലൊന്നായി ലോകത്തിലെ ഏറ്റവും പ്രായം കൂടിയ കരജീവിയായി ഗിന്നസ് വേള്ഡ് റെക്കോര്ഡില് ഇടം നേടിയ ‘ജൊനാഥന്’ എന്ന ഭീമന് ആമയുമായും പ്രധാനമന്ത്രി കൂടിക്കാഴ്ച നടത്തും. 1832-ല് ജനിച്ചതായി കരുതപ്പെടുന്ന ജൊനാഥന് ഏകദേശം 194 വയസ്സ് പ്രായമുണ്ടെന്നാണ് കണക്ക്.
സന്ദര്ശനത്തിന് മുന്നോടിയായി പുറത്തിറക്കിയ പ്രസ്താവനയില് സീഷെല്സിനെ ഇന്ത്യയുടെ ‘പ്രധാന സമുദ്ര അയല്രാജ്യവും ഇന്ത്യന് മഹാസമുദ്ര മേഖലയിലെ വിശ്വസ്ത പങ്കാളിയും’ എന്ന് പ്രധാനമന്ത്രി വിശേഷിപ്പിച്ചു. ‘വിഷന് മഹാസാഗര്’ പദ്ധതിയുടെ ഭാഗമായി ഇരു രാജ്യങ്ങളുടെയും സഹകരണം കൂടുതല് ശക്തിപ്പെടുത്തുകയാണ് സന്ദര്ശനത്തിന്റെ ലക്ഷ്യമെന്ന് അദ്ദേഹം വ്യക്തമാക്കി. ഇന്ത്യന് മഹാസമുദ്ര മേഖലയിലെ സമാധാനം, സുരക്ഷ, വികസനം എന്നിവയില് സംയുക്ത പ്രതിബദ്ധത കൂടുതല് ഊട്ടിയുറപ്പിക്കുമെന്നും പ്രധാനമന്ത്രി പറഞ്ഞു.
ഈ സന്ദര്ശനം ഇന്ത്യ-സീഷെല്സ് ബന്ധത്തെ പുതിയ ഉയരങ്ങളിലേക്ക് എത്തിക്കുന്നതിനൊപ്പം, സമുദ്രസുരക്ഷ, പ്രതിരോധം, സാമ്പത്തിക സഹകരണം തുടങ്ങിയ മേഖലകളില് കൂടുതല് പുരോഗതിക്ക് വഴിയൊരുക്കുമെന്നാണ് നയതന്ത്ര വൃത്തങ്ങളുടെ വിലയിരുത്തല്.
