ശ്രീനഗര്‍: ഈ വര്‍ഷത്തെ അമര്‍നാഥ് തീര്‍ത്ഥാടനത്തിന് ഔദ്യോഗിക തുടക്കം കുറിച്ചുകൊണ്ട് ജമ്മു-കശ്മീര്‍ ലെഫ്റ്റനന്റ് ഗവര്‍ണര്‍ മനോജ് സിന്‍ഹ അമര്‍നാഥ് ഗുഹാക്ഷേത്രത്തില്‍ പരമ്പരാഗത ‘പ്രഥമ പൂജ’ നിര്‍വഹിച്ചു. ജ്യേഷ്ഠ പൗര്‍ണിമ ദിനമായ തിങ്കളാഴ്ചയാണ് ‘ബാബാ ബര്‍ഫാനി’ എന്നറിയപ്പെടുന്ന ഹിമലിംഗത്തിന് മുന്നില്‍ പ്രത്യേക പൂജകളും പ്രാര്‍ഥനകളും നടന്നത്.
രാജ്യത്തെ ജനങ്ങളുടെ സമാധാനത്തിനും സമൃദ്ധിക്കും ആരോഗ്യത്തിനും വേണ്ടിയാണ് താന്‍ പ്രാര്‍ഥിച്ചതെന്ന് പൂജയ്‌ക്ക് ശേഷം മനോജ് സിന്‍ഹ പറഞ്ഞു. ശ്രീ അമര്‍നാഥ് ജി ഷ്രൈന്‍ ബോര്‍ഡിന്റെ നേതൃത്വത്തില്‍ എല്ലാ വര്‍ഷവും തീര്‍ത്ഥാടനത്തിന് മുന്നോടിയായി നടത്തിവരുന്ന പ്രധാന ആചാരമാണ് ‘പ്രഥമ പൂജ’. ഇതോടെയാണ് വാര്‍ഷിക തീര്‍ത്ഥാടനത്തിനുള്ള ആത്മീയ ഒരുക്കങ്ങള്‍ക്ക് സമ്പൂര്‍ണതയാകുന്നത്.
പൊതുജനങ്ങള്‍ക്കായുള്ള അമര്‍നാഥ് തീര്‍ത്ഥാടനം ജൂലൈ 3-ന് ആരംഭിക്കും. ഇത്തവണ 57 ദിവസം നീളുന്ന യാത്ര രക്ഷാബന്ധന്‍ ദിനമായ ഓഗസ്റ്റ് 28-ന് സമാപിക്കും. അനന്ത്‌നാഗ് ജില്ലയിലെ പഹല്‍ഗാം പാതയിലൂടെയും ഗന്ദര്‍ബാല്‍ ജില്ലയിലെ ബാല്‍താല്‍ പാതയിലൂടെയും ഒരേസമയം തീര്‍ത്ഥാടനം നടക്കും. പഹല്‍ഗാം പാത പരമ്പരാഗതവും ദൈര്‍ഘ്യമേറിയതുമായ മാര്‍ഗമാണെങ്കില്‍, ബാല്‍താല്‍ പാത താരതമ്യേന കുറഞ്ഞ ദൂരമുള്ളതിനാല്‍ വേഗത്തില്‍ ദര്‍ശനം നടത്തി മടങ്ങാന്‍ സാധിക്കും.
അതേസമയം, സമീപകാല ഭീകരഭീഷണികളുടെ പശ്ചാത്തലത്തില്‍ ചരിത്രത്തിലെ ഏറ്റവും ശക്തമായ സുരക്ഷാ സംവിധാനമാണ് ഇത്തവണ തീര്‍ത്ഥാടനത്തിനായി ഒരുക്കിയിരിക്കുന്നത്. ഇന്ത്യന്‍ സൈന്യം, സി.ആര്‍.പി.എഫ്, ജമ്മു-കശ്മീര്‍ പൊലീസ് എന്നിവയുടെ നേതൃത്വത്തില്‍ ബഹുസ്ഥര സുരക്ഷാ വലയമാണ് തീര്‍ത്ഥാടന പാതകളില്‍ സജ്ജമാക്കിയിരിക്കുന്നത്.
തീര്‍ത്ഥാടകരുടെ ആദ്യ സംഘം ജൂലൈ 2-ന് ജമ്മുവിലെ ഭഗവതി നഗര്‍ ബേസ് ക്യാമ്പില്‍ നിന്ന് ലെഫ്റ്റനന്റ് ഗവര്‍ണര്‍ മനോജ് സിന്‍ഹയുടെ നേതൃത്വത്തില്‍ ഔദ്യോഗികമായി ഫ്‌ലാഗ് ഓഫ് ചെയ്യും. ജൂലൈ 3 മുതല്‍ ഭക്തര്‍ക്ക് ബാബാ ബര്‍ഫാനിയുടെ ദര്‍ശനത്തിനായി യാത്ര ആരംഭിക്കും.
