ഇന്ഡോര്: മാട്രിമോണിയല് വെബ്സൈറ്റിലൂടെ പരിചയപ്പെട്ട യുവതിയെ വിവാഹ വാഗ്ദാനം നല്കി 26.86 ലക്ഷം രൂപ തട്ടിയെടുത്തെന്ന കേസില് 29-കാരനെ മധ്യപ്രദേശ് പൊലീസ് അറസ്റ്റ് ചെയ്തു. ഉത്തര്പ്രദേശിലെ ഗൗതം ബുദ്ധ് നഗര് ജില്ലയിലെ ജേവാര് സ്വദേശിയായ ജിതേന്ദ്ര കുമാര് ചോങ്കര് അഥവാ ജീതുവിനെയാണ് പിടികൂടിയത്.
ഡല്ഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തില് നിന്ന് റഷ്യയിലേക്ക് പോകാന് ശ്രമിക്കുന്നതിനിടെയാണ് ജൂണ് 27-ന് ഇയാളെ ഇമിഗ്രേഷന് അധികൃതര് തടഞ്ഞുവെച്ചത്. ഇന്ഡോര് സ്വദേശിനിയുടെ പരാതിയുടെ അടിസ്ഥാനത്തില് ഇയാള്ക്കെതിരെ കേസുള്ളതായി കണ്ടെത്തിയതോടെ പ്രതിയെ മധ്യപ്രദേശ് പൊലീസിന് കൈമാറുകയായിരുന്നു.
മാട്രിമോണിയല് വെബ്സൈറ്റിലൂടെ ഇന്ഡോര് സ്വദേശിനിയുമായി പരിചയപ്പെട്ട പ്രതി, താന് മര്ച്ചന്റ് നേവി ഉദ്യോഗസ്ഥനാണെന്ന് പരിചയപ്പെടുത്തിയതായി പൊലീസ് അറിയിച്ചു. തുടര്ന്ന് വിവാഹ വാഗ്ദാനം നല്കി യുവതിയുടെ വിശ്വാസം നേടിയ ശേഷം വിവിധ ആവശ്യങ്ങള് പറഞ്ഞ് ഇയാള് ലക്ഷക്കണക്കിന് രൂപ കൈപ്പറ്റിയെന്നാണ് കേസ്.
ഒരു ഘട്ടത്തില് തനിക്ക് ബ്ലഡ് കാന്സറാണെന്നും ചികിത്സയ്ക്കായി പണം ആവശ്യമാണെന്നും വിശ്വസിപ്പിച്ചും യുവതിയില് നിന്ന് പണം വാങ്ങിയതായി അന്വേഷണത്തില് കണ്ടെത്തിയതായി പൊലീസ് വ്യക്തമാക്കി. അന്വേഷണത്തിനിടെ പ്രതി റഷ്യയിലെ മോസ്കോയില് നിര്മ്മാണ തൊഴിലാളികളുടെ സൂപ്പര്വൈസറായി ജോലി ചെയ്തിരുന്നതായും വ്യക്തമായിട്ടുണ്ട്. സംഭവത്തില് കേസെടുത്ത പൊലീസ് സാമ്പത്തിക ഇടപാടുകളടക്കം വിശദമായി പരിശോധിച്ച് അന്വേഷണം തുടരുകയാണ്.
