തൃശ്ശൂർ: വടക്കാഞ്ചേരി അകമലയിൽ ആറുവയസ്സുകാരിയെ കടിച്ച് പരിക്കേൽപ്പിച്ച സംഭവത്തിൽ യുവാവിനെ പോലീസ് കസ്റ്റഡിയിലെടുത്തു. പറയാൽ സ്വദേശിയായ വിഷ്ണുവാണ് കസ്റ്റഡിയിലുള്ളത്.
ഇന്ന് വൈകിട്ട് അഞ്ചുമണിയോടെയാണ് അകമല ക്ഷേത്രക്കുളത്തിന് സമീപം സംഭവം നടന്നത്. മുത്തശ്ശനൊപ്പം കുളിക്കാനെത്തിയ ആറുവയസ്സുകാരിക്കുനേരെയാണ് ആക്രമണമുണ്ടായത്.
പ്രദേശത്തുണ്ടായിരുന്ന യുവാവ് അപ്രതീക്ഷിതമായി കുട്ടിയെ ആക്രമിക്കുകയായിരുന്നുവെന്നാണ് വിവരം. ആക്രമണത്തിൽ കുട്ടിയുടെ കവിളിൽ പരിക്കേറ്റു.
പരിക്കേറ്റ കുട്ടിയെ ഉടൻ തന്നെ വടക്കാഞ്ചേരി ജില്ലാ ആശുപത്രിയിൽ പ്രവേശിപ്പിച്ചു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
