ലോര്‍ഡ്‌സില്‍ ചരിത്രമെഴുതി ഇന്ത്യന്‍ വനിത; ലോകകപ്പ് ഫൈനലില്‍ അമ്പയറാകുന്ന ആദ്യ ഇന്ത്യന്‍ വനിതയാകാന്‍ വൃന്ദ റാത്തി

മുംബൈ: ഇന്ത്യന്‍ വനിതാ ക്രിക്കറ്റ് ടീം 2026 വനിതാ ടി20 ലോകകപ്പില്‍ നേരത്തെ പുറത്തായെങ്കിലും ഫൈനലില്‍ ഇന്ത്യയുടെ സാന്നിധ്യം ഉറപ്പിച്ച് ചരിത്രം കുറിക്കുകയാണ് അമ്പയര്‍ വൃന്ദ റാത്തി. ഇംഗ്ലണ്ടും ഓസ്‌ട്രേലിയയും തമ്മില്‍ നാളെ ലോര്‍ഡ്‌സില്‍ നടക്കുന്ന വനിതാ ടി20 ലോകകപ്പ് ഫൈനലില്‍ ഓണ്‍-ഫീല്‍ഡ് അമ്പയറായി പ്രവര്‍ത്തിക്കാന്‍ അന്താരാഷ്‌ട്ര ക്രിക്കറ്റ് കൗണ്‍സില്‍ (ഐ.സി.സി.) വൃന്ദയെ നിയമിച്ചു.

നവി മുംബൈയിലെ നെറുല്‍ സ്വദേശിനിയായ 37-കാരിയായ വൃന്ദ റാത്തി, ജാക്വലിന്‍ വില്യംസിനൊപ്പമാണ് മത്സരം നിയന്ത്രിക്കുക. വനിതാ ലോകകപ്പ് ഫൈനലില്‍ ഓണ്‍-ഫീല്‍ഡ് അമ്പയറാകുന്ന ആദ്യ ഇന്ത്യന്‍ വനിത എന്ന നേട്ടമാണ് ഇതോടെ വൃന്ദ സ്വന്തമാക്കുന്നത്. 1987-ലെ പുരുഷ ലോകകപ്പ് ഫൈനലില്‍ അമ്പയറായിരുന്ന രാം ബാബു ഗുപ്തയ്‌ക്ക് ശേഷം ഐ.സി.സി. ലോകകപ്പ് ഫൈനലില്‍ ഓണ്‍-ഫീല്‍ഡ് അമ്പയറാകുന്ന രണ്ടാമത്തെ ഇന്ത്യന്‍ കൂടിയാണ് വൃന്ദ.

അതേസമയം, ജി.എസ്. ലക്ഷ്മി 2023, 2024 വനിതാ ടി20 ലോകകപ്പ് ഫൈനലുകളില്‍ മാച്ച് റഫറിയായി പ്രവര്‍ത്തിച്ചിരുന്നു. ഇതിനകം 20 വനിതാ ഏകദിന മത്സരങ്ങളിലും 77 വനിതാ ടി20 അന്താരാഷ്‌ട്ര മത്സരങ്ങളിലും ഒരു വനിതാ ടെസ്റ്റ് മത്സരത്തിലും വൃന്ദ അമ്പയറായി സേവനമനുഷ്ഠിച്ചിട്ടുണ്ട്. മുംബൈ സര്‍വകലാശാല വനിതാ ടീമിനായി നാല് വര്‍ഷം മീഡിയം പേസറായി കളിച്ചിരുന്ന വൃന്ദ പിന്നീട് അമ്പയറിംഗിലേക്കാണ് ശ്രദ്ധ തിരിച്ചത്.

മുന്‍ ബി.സി.സി.ഐ. അമ്പയറും മുംബൈ ക്രിക്കറ്റ് അസോസിയേഷന്‍ അമ്പയറിംഗ് കമ്മിറ്റി മുന്‍ ചെയര്‍മാനുമായ ഗണേഷ് അയ്യരുടെ പ്രോത്സാഹനത്തെ തുടര്‍ന്നാണ് അമ്പയറാകാന്‍ തീരുമാനിച്ചത്. 2014-ല്‍ മുംബൈ ക്രിക്കറ്റ് അസോസിയേഷന്റെ അമ്പയര്‍ പരീക്ഷ വിജയിച്ച വൃന്ദ, 2018-ല്‍ ബി.സി.സി.ഐ.യുടെ അമ്പയര്‍ പരീക്ഷയും വിജയിച്ചു. 2020-ല്‍ ഐ.സി.സി. ഡെവലപ്‌മെന്റ് പാനലിലേക്കും തിരഞ്ഞെടുക്കപ്പെട്ടു.

2023 ഡിസംബറില്‍ ഇന്ത്യയും ഇംഗ്ലണ്ടും തമ്മില്‍ നവി മുംബൈയിലെ ഡി.വൈ. പാട്ടീല്‍ സ്റ്റേഡിയത്തില്‍ നടന്ന വനിതാ ടെസ്റ്റ് മത്സരത്തില്‍ അമ്പയറായതോടെ വനിതാ ടെസ്റ്റില്‍ അമ്പയറാകുന്ന ആദ്യ ഇന്ത്യന്‍ വനിതയെന്ന ചരിത്രവും വൃന്ദ സ്വന്തമാക്കിയിരുന്നു. 2022-ലെ കോമണ്‍വെല്‍ത്ത് ഗെയിംസിലും 2023 വനിതാ ടി20 ലോകകപ്പിലും ഉദ്ഘാടന വനിതാ പ്രീമിയര്‍ ലീഗ് ഫൈനലിലും ചൈനയിലെ ഏഷ്യന്‍ ഗെയിംസിലും വൃന്ദ അമ്പയറിംഗ് സംഘത്തിന്റെ ഭാഗമായിരുന്നു.

2023-ല്‍ രഞ്ജി ട്രോഫിയിലെ ഗോവ-പുതുച്ചേരി പുരുഷ മത്സരത്തില്‍ അമ്പയറായതിലൂടെ ഇന്ത്യയില്‍ പുരുഷ ആഭ്യന്തര മത്സരത്തില്‍ ഓണ്‍-ഫീല്‍ഡ് അമ്പയറായ ആദ്യ വനിതകളില്‍ ഒരാളെന്ന നേട്ടവും വൃന്ദ സ്വന്തമാക്കി.