ലക്നൗ: അയോധ്യ രാമക്ഷേത്രത്തിലെ സ്വർണലിപിയിലുള്ള അപൂർവ രാമചരിതമാനസ് ഗ്രന്ഥം കാണാതായെന്ന പ്രചാരണങ്ങൾക്ക് വിരാമമിട്ട് ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റ്. ഗ്രന്ഥം പൂർണ സുരക്ഷിതമാണെന്ന് വ്യക്തമാക്കിയ ട്രസ്റ്റ്, അതിന്റെ ചിത്രവും പുറത്തുവിട്ടു.
സമീപ ദിവസങ്ങളായി സമൂഹമാധ്യമങ്ങളിൽ സ്വർണ രാമചരിതമാനസ് കാണാതായെന്ന തരത്തിൽ വ്യാപക പ്രചാരണങ്ങൾ നടന്നിരുന്നു. ഇതിന് പിന്നാലെയാണ് ക്ഷേത്ര ട്രസ്റ്റ് ഔദ്യോഗിക വിശദീകരണവുമായി രംഗത്തെത്തിയത്. സ്വർണലിപിയിൽ തയ്യാറാക്കിയ അപൂർവ രാമചരിതമാനസ് ഗ്രന്ഥം ക്ഷേത്രത്തിൽ സുരക്ഷിതമായി സൂക്ഷിച്ചിരിക്കുകയാണ്. ഗ്രന്ഥം നഷ്ടപ്പെട്ടെന്ന വാർത്തകൾ അടിസ്ഥാനരഹിതമാണെന്നും വ്യാജ പ്രചാരണങ്ങൾ വിശ്വസിക്കരുതെന്നും ട്രസ്റ്റ് അഭ്യർഥിച്ചു. ഗ്രന്ഥത്തിന്റെ ചിത്രം കൂടി പുറത്തുവന്നതോടെ സമൂഹമാധ്യമങ്ങളിൽ പ്രചരിച്ച അഭ്യൂഹങ്ങൾക്ക് വ്യക്തമായ മറുപടിയാണ് ലഭിച്ചിരിക്കുന്നത്.
സ്വർണലിപിയിലുള്ള ഈ അപൂർവ രാമചരിതമാനസ് മധ്യപ്രദേശ് കേഡറിലെ മുൻ ഐ.പി.എസ് ഉദ്യോഗസ്ഥൻ ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിന് സമർപ്പിച്ചതാണ്. രാമഭക്തിയുടെ അപൂർവ സ്മാരകങ്ങളിലൊന്നായി കണക്കാക്കപ്പെടുന്ന ഈ ഗ്രന്ഥം ക്ഷേത്രത്തിലെ പ്രത്യേക സുരക്ഷാ സംവിധാനത്തിലാണ് സൂക്ഷിച്ചിരിക്കുന്നതെന്നും ട്രസ്റ്റ് അറിയിച്ചു.
ക്ഷേത്രവുമായി ബന്ധപ്പെട്ട് പ്രചരിക്കുന്ന വാർത്തകൾ ഔദ്യോഗിക സ്രോതസ്സുകളിൽ നിന്ന് മാത്രം വിശ്വസിക്കണമെന്നും തെറ്റായ വിവരങ്ങൾ പ്രചരിപ്പിക്കരുതെന്നും ട്രസ്റ്റ് അഭ്യർഥിച്ചു
