ന്യൂയോര്‍ക്ക്: ലോകകപ്പ് പ്രീക്വാര്‍ട്ടറില്‍ അമേരിക്കക്കെതിരായ മത്സരത്തിന് 24 മണിക്കൂറില്‍ താഴെ മാത്രം ബാക്കി നില്‍ക്കെ അമേരിക്കന്‍ താരം ഫോളറിന്‍ ബലോഗന്റെ മത്സര വിലക്ക് ഫിഫ സസ്‌പെന്‍ഡ് ചെയ്തതിനെതിരെ ബെല്‍ജിയം ഔദ്യോഗികമായി രംഗത്തെത്തി. ബലോഗന്റെ മത്സരയോഗ്യത ചോദ്യം ചെയ്ത് റോയല്‍ ബെല്‍ജിയന്‍ ഫുട്‌ബോള്‍ അസോസിയേഷന്‍ അപ്പീല്‍ നല്‍കിയതോടെ ലോകകപ്പില്‍ വലിയ വിവാദത്തിനാണ് വഴിയൊരുങ്ങിയത്.
ബോസ്‌നിയ ആന്‍ഡ് ഹെര്‍സഗോവിനയ്‌ക്കെതിരായ മത്സരത്തില്‍ ചുവപ്പ് കാര്‍ഡ് ലഭിച്ചതിനെ തുടര്‍ന്ന് ബലോഗന് ലഭിച്ചിരുന്ന ഒരു മത്സര വിലക്ക് നിലനില്‍ക്കുന്നതിനിടെയാണ് ഫിഫ അപ്രതീക്ഷിതമായി അത് സസ്‌പെന്‍ഡ് ചെയ്തത്. ഇതോടെ ഇന്ന് രാത്രി നടക്കുന്ന ലോകകപ്പ് പ്രീക്വാര്‍ട്ടറില്‍ ബെല്‍ജിയത്തിനെതിരെ കളിക്കാന്‍ അമേരിക്കന്‍ സ്ട്രൈക്കര്‍ക്ക് അനുമതി ലഭിച്ചു. ദി അഥ്‌ലറ്റിക് പുറത്തുവിട്ട പ്രത്യേക റിപ്പോര്‍ട്ടിന് പിന്നാലെ ഇന്ന് പുറത്തിറക്കിയ പ്രസ്താവനയിലാണ് റോയല്‍ ബെല്‍ജിയന്‍ ഫുട്‌ബോള്‍ അസോസിയേഷന്‍, ‘വരാനിരിക്കുന്ന മത്സരത്തില്‍ ബലോഗന്റെ യോഗ്യത ചോദ്യം ചെയ്യുകയല്ലാതെ മറ്റൊരു മാര്‍ഗമില്ല’ എന്ന് വ്യക്തമാക്കിയത്.
ബലോഗന്റെ സാഹചര്യത്തില്‍ വന്ന മാറ്റത്തെക്കുറിച്ച് മാധ്യമ റിപ്പോര്‍ട്ടുകളിലൂടെയാണ് തങ്ങള്‍ അറിഞ്ഞതെന്ന് ബെല്‍ജിയം അറിയിച്ചു. തുടര്‍ന്ന് നടപടിക്രമങ്ങളെക്കുറിച്ചും ബാധകമായ നിയമങ്ങളെക്കുറിച്ചും പൂര്‍ണ വിശദീകരണം ആവശ്യപ്പെട്ട് ഫിഫയ്‌ക്ക് കത്തയച്ചതായും അസോസിയേഷന്‍ വ്യക്തമാക്കി. എന്നാല്‍, അതിന് മറുപടിയായി ഫിഫ അയച്ച കത്തില്‍ തങ്ങള്‍ അയച്ച വിശദീകരണാവശ്യ കത്ത് തന്നെ അപ്പീലായി പരിഗണിച്ചെന്നും ഒരു ജഡ്ജിയെ നിയമിച്ചെന്നും അപ്പീല്‍ പൂര്‍ത്തിയാക്കാന്‍ ഏതാനും മണിക്കൂറുകള്‍ മാത്രമാണ് അനുവദിച്ചതെന്നും ബെല്‍ജിയം ആരോപിച്ചു.
‘അപ്പീല്‍ പരിഗണിക്കപ്പെടണമെങ്കില്‍ കാരണം വ്യക്തമാക്കിയ തീരുമാനം ആദ്യം അപ്പീല്‍ നല്‍കുന്ന കക്ഷിക്ക് കൈമാറണമെന്നാണ് ഫിഫയുടെ സ്വന്തം ചട്ടങ്ങള്‍ പറയുന്നത്. എന്നാല്‍ ഞങ്ങള്‍ വിശദീകരണം മാത്രമാണ് ആവശ്യപ്പെട്ടത്. ഫിഫ തന്നെയാണ് അതിനെ അപ്പീലാക്കി മാറ്റിയത്. പിന്നീട് അത് നിയമപരമായി നിലനില്‍ക്കില്ലെന്ന് ഉറപ്പാക്കുന്ന തരത്തിലാണ് നടപടികള്‍ സ്വീകരിച്ചത്,’ പ്രസ്താവനയില്‍ പറയുന്നു. ഇതുവരെ ബലോഗന്റെ വിലക്ക് സസ്‌പെന്‍ഡ് ചെയ്തതുമായി ബന്ധപ്പെട്ട ഒരു തീരുമാനമോ വിശദീകരണമോ ഫിഫയില്‍ നിന്ന് ലഭിച്ചിട്ടില്ലെന്നും ആര്‍ബിഎഫ്എ വ്യക്തമാക്കി.
‘ഞങ്ങളുടെ നിയമാനുസൃതമായ എല്ലാ ചോദ്യങ്ങള്‍ക്കും ഫിഫ മറുപടി നല്‍കാന്‍ വിസമ്മതിച്ചു. അതിനാല്‍ വരാനിരിക്കുന്ന മത്സരത്തില്‍ ബലോഗന്റെ യോഗ്യത ചോദ്യം ചെയ്യുകയല്ലാതെ ഞങ്ങള്‍ക്ക് മറ്റ് മാര്‍ഗമില്ല,’ ബെല്‍ജിയം അറിയിച്ചു. സംഭവവുമായി അടുത്ത ബന്ധമുള്ള വൃത്തങ്ങളെ ഉദ്ധരിച്ച് ദി അഥ്‌ലറ്റിക് റിപ്പോര്‍ട്ട് ചെയ്യുന്നതനുസരിച്ച്, അമേരിക്കന്‍ ഫുട്‌ബോള്‍ ഫെഡറേഷനും ബെല്‍ജിയന്‍ അസോസിയേഷനും ഇന്ന് പുലര്‍ച്ചെ 5 മണിക്ക് മുമ്പ് തങ്ങളുടെ വാദങ്ങള്‍ സമര്‍പ്പിക്കാന്‍ നിര്‍ദേശം ലഭിച്ചു. എന്നാല്‍ ഫിഫയുടെ യഥാര്‍ത്ഥ തീരുമാനം ഇതുവരെ കൈമാറാത്ത സാഹചര്യത്തിലാണ് ഇത്തരമൊരു സമയപരിധി നിശ്ചയിച്ചതെന്നത് ബെല്‍ജിയത്തെ കൂടുതല്‍ അസ്വസ്ഥരാക്കിയിരിക്കുകയാണ്.
ഫിഫ തീരുമാനം പൊതുജനങ്ങള്‍ക്ക് ലഭ്യമാക്കാത്തതിനാല്‍ അതിന്റെ അടിസ്ഥാന രേഖ പോലും ബെല്‍ജിയത്തിന് ലഭിച്ചിട്ടില്ല. യൂറോപ്യന്‍ ഫുട്‌ബോള്‍ ഫെഡറേഷനുകളെയോ കോണ്‍കകാഫിനെയോ പ്രതിനിധീകരിക്കാത്ത, താല്‍പര്യസംഘര്‍ഷം ഒഴിവാക്കാന്‍ തെരഞ്ഞെടുത്ത ഫിഫ അപ്പീല്‍ കമ്മിറ്റിയിലെ ഒരു അംഗത്തെയാണ് കേസ് പരിഗണിക്കാന്‍ നിയമിച്ചിരിക്കുന്നത്. ഇരു വിഭാഗങ്ങളുടെയും വാദം കേള്‍ക്കാനാണ് തീരുമാനം. മത്സരത്തിന് മുമ്പ് വിധി വരാന്‍ സാധ്യതയുണ്ടെങ്കിലും അത്തരമൊരു ഉറപ്പ് ഫിഫ നല്‍കിയിട്ടില്ലെന്നാണ് ബെല്‍ജിയത്തിന്റെ പരാതി.
ബുധനാഴ്ച രാത്രി മുതല്‍ ഞായറാഴ്ച രാവിലെ വരെ ബലോഗന് ഒരു മത്സര വിലക്കിലായിരുന്നു. പിന്നീട് അപ്രതീക്ഷിതമായി ഫിഫ ആ വിലക്ക് സസ്‌പെന്‍ഡ് ചെയ്തു. ഇത്തരമൊരു സാഹചര്യത്തില്‍ വീണ്ടും ഫിഫ നിലപാട് മാറ്റുമെന്നത് അസാധാരണമായ സംഭവമായിരിക്കുമെന്നാണ് വിലയിരുത്തല്‍. ഇപ്പോഴത്തെ അപ്പീല്‍ നടപടിക്രമവുമായി ബന്ധപ്പെട്ടതാണോ, അല്ലെങ്കില്‍ മത്സരത്തിന് മുമ്പ് വീണ്ടും തീരുമാനം മാറാന്‍ സാധ്യതയുണ്ടോ എന്നത് വ്യക്തമല്ല. ഫിഫയുടെ തീരുമാനം എന്തുകൊണ്ടാണെന്ന് വ്യക്തമാക്കുന്ന രേഖയും റഫറീസ് സമിതിയുടെ റിപ്പോര്‍ട്ടും ബെല്‍ജിയം ആവശ്യപ്പെട്ടതായി ദി അഥ്‌ലറ്റിക് നേരത്തെ റിപ്പോര്‍ട്ട് ചെയ്തിരുന്നു.
എന്നാല്‍ ശിക്ഷാനടപടികളുമായി ബന്ധപ്പെട്ട കാരണങ്ങള്‍ പുറത്തുവിടാതിരിക്കാന്‍ ഫിഫയുടെ അച്ചടക്ക സമിതിക്ക് അധികാരമുണ്ട്. ഈ വിഷയത്തില്‍ പ്രതികരണത്തിനായി ഫിഫയെ സമീപിച്ചിട്ടുണ്ടെങ്കിലും ഇതുവരെ മറുപടി ലഭിച്ചിട്ടില്ല.
