നോട്ടിങ്ഹാം: ഇംഗ്ലണ്ടിനെതിരായ മൂന്നാം ടി20യില്‍ ഇന്ത്യ നേരിട്ട നാണംകെട്ട തോല്‍വിക്ക് പിന്നാലെ ഇന്ത്യന്‍ ടീം മാനേജ്മെന്റിനും മുഖ്യപരിശീലകന്‍ ഗൗതം ഗംഭീറിനും എതിരെ ആരാധകരുടെ ശക്തമായ പ്രതിഷേധം. സഞ്ജു സാംസണെ ടീമിലേക്ക് തിരിച്ചുകൊണ്ടുവരണമെന്ന് ആവശ്യപ്പെട്ട് ഇന്ത്യന്‍ ആരാധകര്‍ ‘We Want Sanju Samson’ എന്ന മുദ്രാവാക്യം വിളിച്ച് പ്രതിഷേധിച്ചു.
ട്രെന്റ് ബ്രിഡ്ജിലെ മത്സരശേഷം ടീം ബസിലേക്ക് നടന്നുപോകുകയായിരുന്ന ഗംഭീറിനെ ചുറ്റിപ്പറ്റിയാണ് പ്രതിഷേധമുയര്‍ന്നത്. സുരക്ഷാ ഉദ്യോഗസ്ഥരുടെ അകമ്പടിയോടെ ബസിലേക്ക് നടന്ന ഗംഭീര്‍ തലതാഴ്‌ത്തി മൗനമായി നടന്നുപോയ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചു. ഗംഭീറിന്റെ ശരീരഭാഷ തന്നെ ടീം മാനേജ്മെന്റിന്റെ തീരുമാനങ്ങളെക്കുറിച്ചുള്ള വിമര്‍ശനങ്ങള്‍ക്ക് ആക്കം കൂട്ടി.
View this post on Instagram
202 റണ്‍സ് വിജയലക്ഷ്യം പിന്തുടര്‍ന്ന ഇന്ത്യ, ഇംഗ്ലണ്ടിന്റെ ബൗളിങ് ആക്രമണത്തിന് മുന്നില്‍ 11.4 ഓവറില്‍ വെറും 76 റണ്‍സിന് ഓള്‍ഔട്ടായി. 125 റണ്‍സിന്റെ തോല്‍വിയോടെ ടി20 അന്താരാഷ്‌ട്ര ക്രിക്കറ്റില്‍ റണ്‍സിന്റെ അടിസ്ഥാനത്തില്‍ ഇന്ത്യയുടെ ഏറ്റവും വലിയ തോല്‍വിയാണിത്. ഇതോടെ അഞ്ച് മത്സരങ്ങളുടെ പരമ്പരയില്‍ ഇംഗ്ലണ്ട് 2-0ന് മുന്നിലെത്തി.
2026 ടി20 ലോകകപ്പില്‍ ഇന്ത്യയുടെ കിരീടനേട്ടത്തില്‍ നിര്‍ണായക പങ്കുവഹിച്ച സഞ്ജു സാംസണെ മൂന്ന് മോശം ഇന്നിങ്സുകളുടെ പേരില്‍ പുറത്തിരുത്തിയത് തെറ്റായ തീരുമാനമായിരുന്നുവെന്നാണ് ആരാധകരുടെ വിമര്‍ശനം. സഞ്ജുവിന് പകരം അവസരം ലഭിച്ച പുതിയ ടോപ്പ് ഓര്‍ഡര്‍ ട്രെന്റ് ബ്രിഡ്ജിലെ സ്വിംഗ്, സീം സാഹചര്യങ്ങളില്‍ പൂര്‍ണമായും തകര്‍ന്നടിഞ്ഞതും ആരാധകര്‍ ചൂണ്ടിക്കാട്ടുന്നു.
മത്സരശേഷം വാര്‍ത്താസമ്മേളനത്തില്‍ സഞ്ജുവിന്റെ അഭാവത്തെക്കുറിച്ചുള്ള ചോദ്യത്തിന് മറുപടി നല്‍കിയ ഗംഭീര്‍, സഞ്ജുവിന്റെ തിരിച്ചുവരവിന് സാധ്യത തള്ളിക്കളഞ്ഞില്ല. ‘സഞ്ജുവിനെ സംബന്ധിച്ച് ഞങ്ങളുടെ നിലപാട് വ്യക്തമാണ്. ഇന്ത്യക്കായി അദ്ദേഹം ചെയ്ത പ്രകടനങ്ങള്‍ അസാധാരണമാണ്. ചിലപ്പോള്‍ നിലവിലെ ഫോം കൂടി പരിഗണിക്കേണ്ടിവരും. ഈ പരമ്പരയില്‍ അദ്ദേഹത്തിന് തിരിച്ചുവരാന്‍ കഴിയില്ലെന്ന് ആരും പറഞ്ഞിട്ടില്ല,’ ഗംഭീര്‍ വ്യക്തമാക്കി.
